भारतीय नागरी विमानन महासंचालनालयाने महत्त्वाचा निर्णय घेत लष्करी वापराच्या विमानतळांवर उड्डाण व उतरणाच्या वेळी विमानातील खिडक्या बंद ठेवण्याचा आदेश मागे घेतला आहे. यापूर्वी सुरक्षा कारणास्तव प्रवाशांना खिडक्या बंद ठेवण्याचे निर्देश देण्यात आले होते. आता मात्र प्रवाशांना खिडक्या उघड्या ठेवण्याची परवानगी देण्यात आली आहे.
मे महिन्यात काही लष्करी आणि नागरी संयुक्त विमानतळांवरून प्रवास सुरू झाला होता. त्या पार्श्वभूमीवर सुरक्षेच्या कारणास्तव या ठिकाणी उड्डाण आणि लँडिंगवेळी खिडक्यांमधून छायाचित्रण किंवा व्हिडीओ चित्रीकरण होऊ नये म्हणून खिडक्या बंद ठेवण्याचा नियम लागू करण्यात आला होता.
मात्र, नव्या आदेशानुसार खिडक्या बंद ठेवण्याचा सक्तीचा नियम आता रद्द करण्यात आला असला तरी, विमानतळ परिसरात छायाचित्रण व चित्रीकरणावर लष्करी नियमांनुसार पूर्वीप्रमाणेच बंदी कायम राहणार आहे. विशेषत: जुहू आणि अशा संवेदनशील लष्करी ठिकाणी या नियमांचे पालन करणे अनिवार्य असेल.
या निर्णयामुळे प्रवाशांना आता उड्डाण व लँडिंगदरम्यान बाहेरचा देखावा पाहण्याची मुभा मिळणार आहे. यामुळे प्रवासाचा अनुभव अधिक खुला आणि आनंददायी होण्याची शक्यता आहे. विमान कंपन्यांनाही प्रवासी अनुभव सुधारण्यासाठी अधिक लवचिकता प्राप्त झाली आहे.
याच पार्श्वभूमीवर भारतीय नागरी विमानन महासंचालनालयाने देशातील वैमानिक प्रशिक्षण संस्थांसाठी “राष्ट्रीय श्रेणी प्रणाली” लागू करण्याचा निर्णय घेतला आहे. ऑक्टोबर २०२५ पासून लागू होणाऱ्या या प्रणालीअंतर्गत संस्थांना A++ ते B श्रेणीमध्ये वर्गीकृत करण्यात येणार आहे. या निर्णयामुळे वैमानिक प्रशिक्षणाच्या गुणवत्तेत पारदर्शकता आणि दर्जा वाढेल, अशी अपेक्षा आहे.
