स्वतंत्र बातमी

पुणे रेल्वे स्थानकावर रविवारी चौदा जून रोजी विशेष वाहतूक ब्लॉक घेण्यात येणार आहे. यार्डातील पायाभूत सुविधांच्या आधुनिकीकरणासाठी आणि सुरक्षितता वाढवण्यासाठी हा मेगा बॉल्क घेण्यात येत आहे. पुणे ते दौंड विभागातील एका महत्त्वाच्या पॉइंट जोडणीचे काम करण्यासाठी अभियांत्रिकी, संकेत प्रणाली, दूरसंचार आणि ओव्हरहेड यंत्रणेचे काम केले जाणार आहे. हा ब्लॉक रविवारी सकाळी आठ वाजल्यापासून ते सायंकाळी पाच वाजेपर्यंत म्हणजेच एकूण नऊ तास चालू राहणार आहे. या कालावधीत रेल्वे स्थानकावरील फलाट क्रमांक तीन आणि फलाट क्रमांक चार गाड्यांच्या वाहतुकीसाठी पूर्णपणे बंद ठेवण्यात येणार आहेत.

अनेक रेल्वे गाड्या रद्द

या तांत्रिक कामांमुळे रेल्वे वाहतुकीवर मोठा परिणाम होणार आहे. प्रशासनाने अनेक गाड्या रद्द करण्याचा निर्णय घेतला आहे. यामध्ये पुणे ते तळेगाव लोकल, तळेगाव ते पुणे लोकल, बारामती ते पुणे डेमू, पुणे ते दौंड डेमू आणि सातारा ते पुणे डेमू या गाड्या रविवारी धावणार नाहीत. तसेच पुणे ते नागपूर आणि नागपूर ते पुणे एक्सप्रेस, यासोबतच मुंबई ते पुणे आणि पुणे ते मुंबई डेक्कन एक्सप्रेस या प्रमुख एक्सप्रेस गाड्या पूर्णपणे रद्द करण्यात आल्याची माहिती रेल्वे प्रशासनाकडून देण्यात आली आहे.

बदली स्थानकांवरून गाड्या सुटणार

या ब्लॉक दरम्यान काही एक्सप्रेस गाड्या पुणे स्थानकावर न येता उपनगरातील पर्यायी स्थानकांवर थांबवून तिथूनच परत सोडल्या जातील. जयपूर ते पुणे एक्सप्रेस आणि छत्रपती शिवाजी महाराज टर्मिनस मुंबई ते पुणे एक्सप्रेस या गाड्या खडकी स्थानकावर थांबवण्यात येतील. तसेच पुणे ते जयपूर एक्सप्रेस आणि पुणे ते मुंबई एक्सप्रेस या गाड्या पुणे स्थानकाऐवजी खडकी स्थानकावरून त्यांच्या नियमित वेळेनुसार सुटतील. यामुळे प्रवाशांना प्रवासाचे नियोजन करताना या पर्यायी स्थानकांचा वापर करावा लागेल.

काही गाड्यांचा प्रवास मर्यादित

जम्मू तावी ते पुणे झेलम एक्सप्रेस आणि अमरावती ते पुणे एक्सप्रेस या गाड्या पुणे स्थानकाऐवजी हडपसर स्थानकावर आपला प्रवास समाप्त करतील. तसेच पुणे ते कोल्हापूर एक्सप्रेस ही गाडी पुण्याऐवजी थेट सातारा स्थानकावरून कोल्हापूरसाठी रवाना होईल. या बदलांमुळे नियमित प्रवासी, नोकरदार आणि ग्रामीण भागातून येणाऱ्या नागरिकांना काही अंशी गैरसोयीचा सामना करावा लागू शकतो, परंतु रेल्वेच्या सुरक्षिततेसाठी हे काम अत्यंत आवश्यक असल्याचे प्रशासनाने सांगितले आहे.

प्रवाशांना रेल्वेचे आवाहन

या ब्लॉकमुळे मुंबई आणि इतर भागांतून येणाऱ्या रेल्वे गाड्यांना सर्वाधिक फटका बसण्याची शक्यता आहे. रेल्वे प्रशासनाने प्रवाशांना आवाहन केले आहे की, रविवारी प्रवासाला निघण्यापूर्वी रेल्वेचे सुधारित वेळापत्रक तपासूनच घराबाहेर पडावे. तसेच अधिक माहितीसाठी प्रवाशांनी एकशे एकोणचाळीस या टोल फ्री क्रमांकावर संपर्क साधून खात्री करावी, जेणेकरून स्थानकावर आल्यानंतर कोणत्याही प्रकारचा खोळंबा होणार नाही.