ऑलिव्ह रिडले हे जगातील सर्वात लहान सागरी कासवांपैकी एक असून, ते आंतरराष्ट्रीय निसर्ग संवर्धन संघटनेच्या (IUCN) यादीनुसार असुरक्षित प्रजातींमध्ये गणले जाते. ही कासवे प्रजननासाठी दर वर्षी त्याच किनाऱ्यावर परत येण्याची सहज प्रवृत्ती (नेस्ट साइट फिडेलिटी) दाखवतात, त्यामुळे त्यांच्या मूळ अंडी घालण्याच्या जागा सुरक्षित ठेवणे अत्यंत महत्त्वाचे असते. महाराष्ट्रात रत्नागिरी जिल्ह्यातील वेलास गावातून सुमारे दोन दशकांपूर्वी सह्याद्री निसर्ग मित्र संस्थेने सुरू केलेले हे संवर्धन काम, आता संपूर्ण कोकण किनारपट्टीवर वन विभाग, स्थानिक स्वयंसेवक आणि महिला बचत गटांच्या सहभागातून एका मोठ्या लोकचळवळीत रूपांतरित झाले आहे.