स्वतंत्र बातमी

भारतीय तंत्रज्ञान संस्था (आयआयटी) मुंबईने डिजिटल परिवर्तनाच्या युगात कुशल व्यावसायिक घडवण्यासाठी एक महत्त्वपूर्ण पाऊल उचलले आहे. वाढत्या ई-शासनाच्या पार्श्वभूमीवर संस्थेने दोन वर्षांचा ऑनलाईन ‘ई-पोस्ट ग्रॅज्युएट डिप्लोमा इन डिजिटल गव्हर्नन्स’ अभ्यासक्रम सुरू केला आहे. कृत्रिम बुद्धिमत्ता, डिजिटल तंत्रज्ञान आणि सायबर सुरक्षेचे वाढते महत्त्व लक्षात घेऊन हा निर्णय घेण्यात आला आहे. सरकार, उद्योग आणि विविध संस्था वेगाने डिजिटल स्वरूपात बदलत आहेत. या पार्श्वभूमीवर डिजिटल पायाभूत सुविधा, नियमन आणि प्रभावी धोरणांची गरज वाढत आहे. ही गरज पूर्ण करण्यासाठी आयआयटी मुंबईने तंत्रज्ञान आणि सार्वजनिक धोरणाचा समन्वय साधणारा हा प्रगत अभ्यासक्रम तयार केला आहे. या अभ्यासक्रमाच्या माध्यमातून प्रशासकीय, कायदेशीर, नैतिक आणि संस्थात्मक आव्हानांना तोंड देणारे नेतृत्व विकसित केले जाईल.