स्वतंत्र बातमी

रायगड जिल्ह्यात पावसाचा हाहाकार सुरू आहे. अंबा नदीची धोका पातळी ९ मीटर निश्चित आहे. ही नदी सध्या १२.२० मीटरवरून वाहत आहे. नागोठणे बाजारपेठेत पुराचे पाणी शिरले आहे. कुंडलिका नदी रोहा परिसरात धोक्याच्या पातळीच्या वर आहे. पाताळगंगा नदी खालापूर आणि आपटा भागात पात्राबाहेर वाहत आहे. खालापूर जवळील सावरोली पुलावरून पाणी वाहू लागल्याने येथील वाहतूक पूर्णपणे बंद करण्यात आली आहे. खोपोली शहरात सखल भागातील घरांमध्ये पाणी शिरले आहे. आपत्ती व्यवस्थापन यंत्रणा पूरग्रस्त भागात गस्त घालत आहे. नागरिकांना उंचावर जाण्याच्या सूचना लाऊडस्पीकरवरून दिल्या जात आहेत. आपत्कालीन नियंत्रण कक्ष २४ तास परिस्थितीवर लक्ष ठेवून आहेत.

मुसळधार पावसामुळे मुंबई-गोवा महामार्गावर वाहनांच्या लांब रांगा लागल्या आहेत. प्रवाशांचे अन्न आणि पाण्याविना हाल होत आहेत. पोलादपूर परिसरात डोंगर उतारावर राहणाऱ्या कुटुंबांना सुरक्षित स्थळी हलवण्यात आले आहे. महाडमधील सावित्री नदीच्या पातळीत वेगाने वाढ होत आहे. समुद्राला असलेल्या भरतीमुळे नदीचे पाणी ओसरण्यात अडथळे येत आहेत. प्रशासनाने आपत्कालीन मदतीसाठी हेल्पलाइन क्रमांक जाहीर केले आहेत. पुढील दोन दिवस अतिवृष्टीचा इशारा कायम आहे.