स्वतंत्र बातमी

मध्य रेल्वे प्रशासनाने दिलेल्या माहितीनुसार गणेशोत्सवाच्या काळात छत्रपती शिवाजी महाराज टर्मिनस येथून ९८ फेऱ्या, लोकमान्य टिळक टर्मिनस येथून ७६ फेऱ्या, पुणे येथून १० फेऱ्या आणि दिवा स्थानकातून ६२ अनारक्षित मेमू फेऱ्या चालवल्या जातील. छत्रपती शिवाजी महाराज टर्मिनस ते सावंतवाडी रोड दरम्यान ३२ दैनंदिन विशेष फेऱ्या धावतील. गाडी क्रमांक ०११०३ ही विशेष रेल्वे ११ ते २६ सप्टेंबर या कालावधीत दुपारी ३.३० वाजता सुटेल. ही गाडी दुसऱ्या दिवशी पहाटे ४ वाजता सावंतवाडी येथे पोहोचेल. परतीची गाडी क्रमांक ०११०४ ही १२ ते २७ सप्टेंबर दरम्यान सावंतवाडी येथून पहाटे ४.३५ वाजता सुटून दुपारी ४.४० वाजता मुंबईत दाखल होईल. या गाड्यांना दादर, ठाणे, पनवेल, रोहा, माणगाव, खेड, चिपळूण, संगमेश्वर, रत्नागिरी, कणकवली, सिंधुदुर्ग आणि कुडाळ या महत्त्वाच्या स्थानकांवर थांबे देण्यात आले आहेत.

प्रवाशांची गैरसोय टाळण्यासाठी मध्य रेल्वेने आरक्षणाची तारीखनिहाय घोषणा केली आहे. १ ऑगस्ट २०२६ रोजी गाडी क्रमांक ०११५३, ०१४४५, ०११६७ आणि ०१४४७ चे बुकिंग सुरू होईल. २ ऑगस्ट रोजी गाडी क्रमांक ०११६५ व ०११८५ चे आरक्षण सुरू करण्यात येईल. ३ ऑगस्ट रोजी गाडी क्रमांक ०११०३, ०११२९, ०११५१, ०११७१ आणि ०११३१ चे बुकिंग उपलब्ध करून दिले जाईल. बहुतांश गाड्यांमध्ये तृतीय वातानुकूलित, शयनयान आणि जनरल क्लास डबे जोडण्यात आले आहेत. दिवा ते खेड दरम्यान ३२ अनारक्षित फेऱ्या आणि दिवा ते चिपळूण दरम्यान ३० अनारक्षित मेमू फेऱ्या चालवण्यात येणार आहेत. अनारक्षित गाड्यांची तिकिटे प्रवाशांना यूटीएस भ्रमणध्वनी ॲपद्वारे सहजरीत्या मिळतील. प्रवासी एनटीईएस आणि रेलवन ॲपवरून गाड्यांची वेळ पाहू शकतात.