स्वतंत्र बातमी

मुंबई महानगरपालिकेच्या मराठी शाळांमध्ये आधीच शिक्षकांची अनेक पदे रिक्त आहेत. शिक्षक भरती प्रक्रिया प्रदीर्घ काळापासून पूर्ण झालेली नाही. नवीन शिक्षकांची प्रतीक्षा कायम आहे. अशा परिस्थितीत २ हजार २७५ शिक्षकांना मतदारयादी सखोल पुनरीक्षणाच्या (एसआयआर) कामासाठी नियुक्त केले आहे. शिक्षकांना वारंवार शाळा सोडून बाहेर जावे लागत आहे. चुनाभट्टी मनपा मराठी शाळा क्रमांक २ मध्ये इयत्ता पहिली ते सातवीसाठी एकूण तीन शिक्षक मंजूर आहेत. सद्यस्थितीत दोन शिक्षकांना बीएलओ ड्युटी लावल्याने केवळ एक मुख्याध्यापक संपूर्ण शाळा सांभाळत आहेत. टिळक मार्ग मराठी शाळेत पहिली ते आठवीच्या वर्गांसाठी दोन शिक्षक आहेत. त्यातील एकाला निवडणुकीचे काम दिल्याने दुसऱ्या शिक्षकावर प्रचंड ताण आला आहे. एक्सर तळेपाखाडी मराठी शाळेत दोनपैकी एकच शिक्षक उपस्थित राहून विद्यार्थ्यांना शिकवत आहे. संजय नगर मराठी शाळेत अशीच बिकट अवस्था पाहायला मिळत आहे.

या अशैक्षणिक कामाबाबत शिक्षकांमध्ये प्रचंड असंतोष पसरला आहे. बळजबरीने लावण्यात आलेल्या कामाच्या निषेधार्थ शिक्षकांनी नुकतेच आझाद मैदानात आंदोलन केले. प्रशासनाकडून दबाव टाकून काम करून घेतले जात आहे. अशा स्थितीतही शिक्षकांची या कामातून सुटका झालेली नाही.