स्वतंत्र बातमी

सांगली जिल्ह्यात चालू खरीप हंगामात सुरुवातीला पावसाने ओढ दिली होती. जून महिन्यात १०० मिलीमीटरपेक्षा कमी पाऊस पडला. मृग, आर्द्रा, पुनर्वसू नक्षत्रात अपेक्षेप्रमाणे पाऊस झाला नाही. जून अखेरपर्यंत जिल्ह्यात केवळ २७ टक्के पेरण्या पूर्ण झाल्या होत्या. जुलै महिन्याच्या पहिल्या आणि तिसऱ्या आठवड्यात विविध भागात चांगला पाऊस झाला. या पावसाच्या जोरावर अखेरच्या टप्प्यात पेरण्यांना कमालीचा वेग मिळाला. कृषी विभागाने दिलेल्या अहवालानुसार जिल्ह्यातील खरीप क्षेत्रापैकी ७६.२ टक्के भागात पेरणी पूर्ण झाली. भात, सोयाबीन, मका, तूर या पिकांची लागवड वेगाने झाली. जूनच्या दुसऱ्या आठवड्यात पेरलेली पिके आता कोळपणीच्या टप्प्यावर आली आहेत. थांबून थांबून येणाऱ्या पावसाच्या सरींमुळे पिकांची वाढ समाधानकारक दिसून येत आहे. जुलैच्या उत्तरार्धात पेरलेली पिके सध्या उगवणीच्या टप्प्यात आहेत.

जिल्ह्यातील पश्चिम आणि मध्य भागाच्या तुलनेत पूर्व भागातील स्थिती वेगळी आहे. जत, आटपाडी आणि कवठेमहांकाळ या दुष्काळी तालुक्यांमध्ये जमिनीत पुरेशी ओल निर्माण झाली नाही. पूर्व भागात प्रामुख्याने बाजरी पिकाची लागवड केली जाते. यंदा जमिनीतील ओलाव्याच्या अभावामुळे या तीन तालुक्यांत बाजरीच्या पेरण्या खोळंबल्या. तालुकानिहाय आकडेवारीनुसार तासगाव तालुक्यात सर्वाधिक ८८ टक्के पेरणी झाली. शिराळा ८० टक्के, खानापूर ८० टक्के, वाळवा ७८ टक्के, आटपाडी ७४ टक्के, जत ७५ टक्के, कवठेमहांकाळ ७१ टक्के, कडेगाव ६८ टक्के, पलूस ६७ टक्के आणि मिरज तालुक्यात ६५ टक्के पेरणी झाली. संपूर्ण जिल्ह्यात तृणधान्याची ७७ टक्के तसेच कडधान्याची ७५ टक्के पेरणी पूर्ण झाली आहे. तृणधान्यामध्ये मका पिकाची लागवड सर्वाधिक क्षेत्रावर झाली आहे. आगामी दिवसांत चांगला पाऊस पडल्यास उर्वरित क्षेत्रातील चित्रात बदल दिसून येईल.