मराठी दूरचित्रवाणीच्या इतिहासात पौराणिक मालिकांनी नेहमीच प्रेक्षकांच्या मनात एक विशेष स्थान निर्माण केले आहे, परंतु कलर्स मराठीवरील ‘आई तुळजाभवानी’ ही मालिका आता एका अशा ऐतिहासिक आणि अध्यात्मिक टप्प्यावर येऊन पोहोचली आहे ज्याची प्रतीक्षा प्रत्येक भाविक आणि रसिक प्रेक्षक करत होता. येत्या २० एप्रिल ते २० मे या कालावधीत दररोज रात्री ९ वाजता प्रेक्षकांना महादेव आणि आई तुळजाभवानी यांच्या विवाहाचा एक अत्यंत अलौकिक आणि मंगलमय प्रवास अनुभवायला मिळणार आहे.
‘अद्भुत विवाहाचा विशेष महिना’ म्हणून ओळखला जाणारा हा काळ प्रेक्षकांसाठी केवळ एक मालिका नसून तो एक दिव्य अध्यात्मिक अनुभव ठरणार आहे. या विवाहाची मांडणी कल्पनेपलीकडची भव्य असणार असून हा केवळ दोन व्यक्तींचा विवाह नसून तो ‘शक्ती’ आणि ‘शिव’ यांच्या मीलनाचा वैश्विक उत्सव आहे. या सोहळ्याचे सर्वात मोठे आकर्षण म्हणजे निसर्गातील पंचमहाभूतांनी अर्थात पृथ्वी, आप, तेज, वायू आणि आकाश यांनी उभा केलेला दैवी मांडव. आधुनिक व्हीएफएक्स तंत्रज्ञान आणि अतिशय भव्य अशा सेटच्या माध्यमातून हा सोहळा इतका जिवंत करण्यात आला आहे की प्रेक्षक स्वतःला एका वेगळ्याच दैवी विश्वात अनुभवतील. साक्षात महादेवांचे अद्भुत वऱ्हाड जेव्हा तुळजापुरात येईल, तो क्षण मराठी टेलिव्हिजनवरील सर्वात नेत्रदीपक क्षणांपैकी एक ठरेल.
विवाह सोहळ्यातील प्रत्येक विधी अतिशय शास्त्रोक्त आणि भावपूर्ण पद्धतीने चित्रित करण्यात आला आहे. यामध्ये पंचदेवींतर्फे केली जाणारी मंगल ओवाळणी, मायेचे केळवण आणि आदिशक्तीच्या हातावर चढणारा सौभाग्याचा हिरवा चुडा हे प्रसंग प्रेक्षकांच्या डोळ्यांचे पारणे फेडणारे असतील. शक्तीरूपाची तेजस्वी हळद आणि त्यातून ओसंडून वाहणारा भक्तीचा रस प्रेक्षकांना मंत्रमुग्ध करेल.
या विधींमधून महाराष्ट्राच्या मातीतील परंपरा आणि पौराणिक संदर्भ यांचा सुंदर मेळ घातला गेला आहे. देवी तुळजाभवानीचा अवतार हा मुळात असुरी शक्तींच्या विनाशासाठी आणि महिषासुराच्या मर्दानासाठी झाला आहे. अशा रणधुमाळीच्या आणि युद्धाच्या पार्श्वभूमीवर महादेवांसोबतचा हा विवाह सोहळा पार पडताना अनेक नाट्यमय घडामोडी घडणार आहेत. एकीकडे विवाहाची लगबग असताना दुसरीकडे महिषासुर आणि शुक्राचार्यांनी रचलेले मायावी कट प्रेक्षकांची उत्कंठा वाढवतील. या लग्नात येणारे अडथळे आणि त्यातून मार्ग काढताना आदिशक्तीने दिलेले सावधगिरीचे संकेत हा प्रवास अत्यंत रोमहर्षक बनवतील. देवी या विवाहासाठी कशी तयार झाली आणि महादेवांनी या अवतारकार्यासाठी कोणती गूढ रचना केली आहे याचे रहस्य या विशेष भागात उलगडणार आहे.
थोडक्यात सांगायचे तर भक्ती, शक्ती आणि कलेचा हा अपूर्व संगम म्हणजे प्रेक्षकांसाठी एक मोठी पर्वणीच आहे. महाराष्ट्राच्या कुलस्वामिनीचा हा शाही विवाह सोहळा म्हणजे केवळ मनोरंजन नसून तो श्रद्धेचा एक उत्सव आहे.