स्वतंत्र बातमी

मुसळधार पावसाचा थेट फटका मुंबई-गोवा राष्ट्रीय महामार्गाच्या कामाला बसला आहे. परशुराम घाट, कशेडी घाट, लांजा आणि संगमेश्वर परिसरात रस्त्यावर मोठ्या प्रमाणावर चिखल झाला असून अर्धवट कामांमुळे वाहने चालवणे अत्यंत कठीण झाले आहे. आरवली, कामथे आणि हातखंबा फाटा या भागांत प्रवाशांना वाहतूक कोंडीचा सामना करावा लागत आहे.

पाण्याचा निचरा योग्य प्रकारे न झाल्यामुळे रस्त्याला काही ठिकाणी नाल्याचे स्वरूप आले आहे. मुसळधार पावसामुळे वीज पुरवठा खंडित होण्याच्या घटना घडत असून दुर्गम भागातील नागरिकांना संपर्क साधण्यात अडचणी येत आहेत. हवामान अंदाजानुसार पुढील दोन ते तीन दिवस कोकण किनारपट्टीवर पावसाचा हाच जोर कायम राहण्याची शक्यता आहे.

जिल्ह्यातील जगबुडी, वसिष्टी, बावनदी आणि काजळी या प्रमुख नद्यांच्या जलपातळीत झपाट्याने वाढ होत आहे. पेढेनजीकच्या डोंगराळ भागातून वाहणारे पाणी आणि काही ठिकाणी झालेली किरकोळ मातीची घसरण यामुळे स्थानिक प्रशासनाने आपत्ती व्यवस्थापन यंत्रणा सज्ज ठेवली आहे. किनारी भागातील नागरिकांवर विशेष लक्ष ठेवले जात आहे.

दुसरीकडे, सतत कोसळणाऱ्या पावसाचा एक सकारात्मक परिणामही दिसत आहे. खेड, चिपळूण, राजापूर आणि गुहागर तालुक्यातील पाझर तलाव व धरणांमधील जलसाठ्यात समाधानकारक वाढ होत असून सुरुवातीला पावसाने ओढ दिल्याने चिंतित असलेला बळीराजा आता सुखावला आहे.