स्वतंत्र बातमी

वायव्य बंगालच्या उपसागरावर उत्तर ओडिशा आणि पश्चिम बंगालच्या किनारपट्टीवर तयार झालेल्या कमी दाबाच्या क्षेत्राची तीव्रता वाढली आहे. पश्चिम राजस्थानावर चक्रीय वाऱ्यांची स्थिती सक्रिय आहे. या दोन्ही हवामान प्रणालींच्या एकत्रित प्रभावातून महाराष्ट्रात मान्सून पुन्हा सक्रिय झाला. कोकण आणि मध्य महाराष्ट्रात ढगांच्या गडगडाटासह पाऊस सुरू आहे. पुढील दोन ते तीन दिवस राज्यात पावसाची तीव्रता कायम राहण्याचा अंदाज हवामान विभागाने व्यक्त केला. विदर्भातील नागपूर, गोंदिया, गडचिरोली आणि चंद्रपूर जिल्ह्यांत वादळी वाऱ्यांसह पावसाची नोंद झाली. मराठवाड्यात हलक्या ते मध्यम स्वरूपाच्या सरी कोसळल्या. जूनच्या तुलनेत जुलै महिन्यात पावसाचे प्रमाण सुधारले आहे. कोकणातील सागरी पट्ट्यात वाऱ्याचा वेग ताशी ४० ते ५० किलोमीटरपर्यंत पोहोचला आहे. स्थानिक प्रशासनाने पर्यटकांना समुद्रकिनाऱ्यावर जाण्यास मज्जाव केला आहे.

हवामान विभागाने दिलेल्या माहितीनुसार रायगड, रत्नागिरी, पुणे घाट आणि सातारा घाटाला ऑरेंज अलर्ट दिला आहे. मुंबई, ठाणे, सिंधुदुर्ग, कोल्हापूर घाट, जळगाव, छत्रपती संभाजीनगर, जालना, हिंगोली, नांदेड, लातूर, बुलढाणा, नागपूर, गोंदिया आणि गडचिरोली या जिल्ह्यांना यलो अलर्ट जारी केला. नाशिक, अहिल्यानगर, धुळे, नंदुरबार, धाराशिव आणि परभणी परिसरात हलक्या सरींची शक्यता वर्तवली आहे. घाटातील रस्त्यांवर दरडी कोसळण्याचा धोका लक्षात घेऊन वाहतुकीत बदल केले आहेत. मुंबई व ठाणे महापालिकेने आपत्कालीन नियंत्रण कक्ष सक्रिय केले आहेत. सखल भागातील नागरिकांना सतर्कतेचा इशारा दिला आहे. आपत्ती व्यवस्थापन पथके मदतीसाठी तयार आहेत. नद्यांच्या पाणीपातळीत वाढ होत असल्याने नदीकाठच्या रहिवाशांना सुरक्षित स्थळी जाण्याच्या सूचना दिल्या आहेत.