बिहारच्या राजकारणात १४ एप्रिल २०२६ हा दिवस महत्त्वाचा ठरला. राज्याचे दीर्घकाळ मुख्यमंत्री राहिलेले नितीश कुमार यांनी आपल्या पदाचा राजीनामा दिला असून, भाजपचे सम्राट चौधरी आता बिहारचे नवे मुख्यमंत्री म्हणून धुरा सांभाळणार आहेत. बिहारच्या इतिहासात पहिल्यांदाच भारतीय जनता पक्षाचा मुख्यमंत्री सत्तेवर येत असल्याने, या घटनेला खास राजकीय महत्त्व प्राप्त झाले आहे.
नितीश कुमार यांनी मंगळवारी पाटणा येथील लोकभवन येथे राज्यपालांची भेट घेऊन आपला राजीनामा सोपवला. गेल्या काही दिवसांपासून नितीश कुमार केंद्रात सक्रिय होणार असल्याच्या चर्चा सुरू होत्या. नुकतीच त्यांची राज्यसभा सदस्य म्हणून निवड झाल्याने त्यांनी मुख्यमंत्रीपद सोडण्याचा निर्णय घेतला. त्यांच्या राजीनाम्यामुळे बिहारमधील वीस वर्षांच्या एका कालखंडाचा अंत झाला आहे. नितीश कुमार यांच्या राजीनाम्यानंतर भाजपच्या विधिमंडळ दलाची बैठक झाली. या बैठकीत सम्राट चौधरी यांची एकमताने नेतेपदी निवड करण्यात आली. केंद्रीय निरीक्षक आणि केंद्रीय मंत्री शिवराज सिंह चौहान यांनी या निवडीची अधिकृत घोषणा केली. सम्राट चौधरी हे सध्या बिहारचे उपमुख्यमंत्री म्हणून काम पाहत होते आणि आता ते राज्याचे नेतृत्व करतील. नवीन सरकारमध्ये काही महत्त्वाचे बदल करण्यात आले आहेत. जेडीयूकडून विजय चौधरी आणि बिजेंद्र यादव शपथ घेणार आहेत. मंत्रिमंडळाचा संपूर्ण विस्तार ५ मे नंतर म्हणजेच पश्चिम बंगाल विधानसभा निवडणुकीच्या निकालानंतर होण्याची शक्यता आहे.
राजकीय तज्ञांच्या मते, बिहारमध्ये भाजप नेहमीच युतीमधील सहकारी म्हणून राहिला होता. मात्र, २०२५ च्या विधानसभा निवडणुकीत एकोणनव्वद जागा जिंकून भाजप सर्वात जास्त जागा जिंकणारा पक्ष ठरला होता. आता स्वतःचा मुख्यमंत्री देऊन भाजपने राज्यात आपली पकड मजबूत केली आहे. सम्राट चौधरी यांनी आपल्या निवडीनंतर पंतप्रधान नरेंद्र मोदी आणि भाजपच्या केंद्रीय नेतृत्वाचे आभार मानले असून, बिहारला विकासाच्या मार्गावर पुढे नेण्याचा संकल्प व्यक्त केला आहे.