उत्तर जपानच्या किनारपट्टीला सोमवारी दुपारी सात पूर्णांक चार रिश्टर स्केल तीव्रतेच्या भीषण भूकंपाचा तडाखा बसला आहे. या शक्तिशाली धक्क्यामुळे संपूर्ण परिसर हादरून गेला असून, जपानच्या हवामान विभागाने तातडीने त्सुनामीचा इशारा जाहीर केला आहे. विशेषतः इवाते प्रान्त आणि होक्काइडो बेटाच्या किनारपट्टी भागांना धोका वर्तवण्यात आला आहे.
हवामान विभागाने दिलेल्या माहितीनुसार, समुद्रामध्ये सुमारे दहा फूट उंचीच्या लाटा उसळण्याची शक्यता आहे. इवाते आणि होक्काइडोच्या किनारी भागात लाटा धडकण्यास सुरुवात झाली असून, प्रशासनाने नागरिकांना तात्काळ समुद्रकिनाऱ्यापासून दूर आणि उंचावर असलेल्या सुरक्षित ठिकाणी जाण्याचे आवाहन केले आहे. “वेळ न घालवता सुरक्षित स्थळी पोहोचा आणि त्सुनामीचा इशारा मागे घेईपर्यंत तिथेच थांबा, अशा कडक सूचना स्थानिक प्रशासनाकडून देण्यात येत आहेत. हा भूकंप दुपारी दीडच्या सुमारास झाला. भूकंपाचा केंद्रबिंदू ईशान्य जपानच्या समुद्रतळाशी होता. या धक्क्याची तीव्रता इतकी प्रचंड होती की, राजधानी टोकियोसह दूरवरच्या शहरांमध्येही इमारतींना हादरे जाणवले. यानंतर काही मिनिटांतच सहा पूर्णांक नऊ रिश्टर स्केलचा दुसरा धक्का होन्शू बेटाच्या पूर्व किनारपट्टीला बसला, ज्यामुळे भीतीचे वातावरण अधिकच वाढले.
जपान सरकारच्या आपत्कालीन सेवांनी युद्धपातळीवर काम सुरू केले आहे. किनारपट्टीच्या हजारो रहिवाशांना सुरक्षित शाळा आणि सरकारी इमारतींमध्ये हलवण्यात येत आहे. प्राथमिक माहितीनुसार, काही भागांत इमारतींच्या काचा फुटल्या असून रस्त्यांना भेगा पडल्या आहेत. मात्र, जीवितहानीबद्दल अद्याप कोणतीही निश्चित माहिती समोर आलेली नाही. खबरदारीचा उपाय म्हणून काही भागांतील वीज पुरवठा खंडित करण्यात आला आहे, जेणेकरून शॉर्ट सर्किटमुळे आगीच्या घटना टाळता येतील. जपान हा देश संवेदनशील क्षेत्रात आहे, जिथे भूपट्ट्यांच्या हालचालींमुळे भूकंपाचे प्रमाण जास्त असते. २०११ मध्ये आलेल्या महाविनाशकारी त्सुनामीच्या आठवणी आजही जपानच्या मनात ताज्या आहेत. त्यामुळेच, आजच्या सात पूर्णांक चार रिश्टर स्केलच्या धक्क्यानंतर यंत्रणा अत्यंत सतर्क असून आधुनिक तंत्रज्ञानाचा वापर करून लाटांच्या हालचालींवर लक्ष ठेवले जात आहे.