होर्मुझमधून भारतीय जहाजे सुखरूप बाहेर

या यशस्वी मोहिमेत सहभागी असलेल्या तीन भारतीय ध्वजांकित कच्चे तेल वाहू जहाजांची नावे ‘देश वैभव’, ‘देश विभोर’ आणि ‘सन्मार हेराल्ड’ अशी आहेत. ही तिन्ही जहाजे चोवीस जून ते एक जुलै या कालावधीत भारतात दाखल होण्याची शक्यता आहे.

केंद्रीय बंदर, जहाजबांधणी आणि जलमार्ग मंत्री सर्वानंद सोनोवाल यांनी सामाजिक संकेतस्थळावरून या घडामोडींची अधिकृत माहिती दिली असून ही सर्व जहाजे सध्या भारताच्या सागरी सीमेकडे मार्गस्थ झाली आहेत. पश्चिम आशियातील युद्धाची भीषणता लक्षात घेता भारतीय जहाजांचा प्रवास सुरक्षित करणे हे केंद्र सरकारपुढील आव्हान होते. भारताची अंतर्गत ऊर्जा पुरवठा साखळी सुरक्षित ठेवण्यासाठी जहाजबांधणी मंत्रालय इतर सुरक्षा यंत्रणांशी, तज्ज्ञांशी आणि नौदलाशी सक्रियपणे समन्वय साधत आहे.

पश्चिम आशियातील युद्ध संपवण्यासाठी झालेल्या तात्पुरत्या शांतता करारानुसार अमेरिकेने इराणवरील सागरी नाकेबंदी उठवली होती. अमेरिकेचे राष्ट्राध्यक्ष डोनाल्ड ट्रम्प यांनी इराणसोबत करारावर स्वाक्षऱ्या केल्या होत्या, ज्यानुसार इराणला युरेनियमचा साठा मर्यादित करावा लागणार होता तर बदल्यात अमेरिकेकडून आर्थिक व व्यापारी निर्बंध मागे घेतले जाणार होते. मात्र लेबनॉन व इतर क्षेत्रांवर इस्रायलकडून सुरू असलेल्या हल्ल्यांच्या पार्श्वभूमीवर इराणने युद्धबंदीच्या अटींचे उल्लंघन झाल्याचा आरोप करत होर्मुझची सामुद्रधुनी पुन्हा बंद करण्याची घोषणा केली असून, हल्ले न थांबल्यास कडक लष्करी कारवाईचा इशाराही दिला आहे.