स्वतंत्र बातमी

रविवारी पहाटे मुंबईच्या वेगवेगळ्या उपनगरांमध्ये पावसाने हजेरी लावली. यामध्ये प्रामुख्याने घाटकोपर, चेंबूर, मानखुर्द, वरळी, लोअर परळ, माहीम आणि वांद्रे या परिसरांचा समावेश आहे. हवामान विभागाने दिलेल्या माहितीनुसार आज दिवसभर मुंबई आणि आसपासच्या परिसरात हलक्या सरी कोसळण्याची शक्यता कायम आहे.

रविवारी झालेल्या मान्सूनपूर्व पावसामुळे मुंबईच्या तापमानात लक्षणीय घट नोंदवली गेली आहे. मागील अनेक दिवसांपासून मुंबईकर उष्ण आणि दमट वातावरणाचा सामना करत होते. हवामान विभागाच्या अंदाजानुसार पुढील आठवड्यात चोवीस ते पंचवीस जूनच्या आसपास मुंबई शहर आणि उपनगरांमध्ये पावसाचा जोर अधिक वाढण्याची शक्यता असून, यादरम्यान अधिकृत मान्सूनचे आगमन देखील होऊ शकते.

यंदाच्या मोसमात तळकोकणात सहा जून रोजी मान्सूनचे आगमन झाले होते. त्यानंतर आठ जून रोजी हर्णे आणि सोलापूर या भागांपर्यंत पोहोचलेला मान्सून पुढील अनेक दिवस एकाच ठिकाणी रेंगाळला होता, ज्यामुळे त्याची पुढील वाटचाल थांबली होती. हवामान विभागाने शनिवारी दिलेल्या माहितीनुसार तेवीस जूनपासून राज्यातील काही भागांमध्ये मान्सूनची प्रगती होण्यासाठी अनुकूल वातावरण निर्माण होत असून, रखडलेला मान्सून आता वेगाने पुढे सरकण्याची चिन्हे आहेत. सध्या काही भागांत उष्णतेच्या लाटेसदृश परिस्थिती कायम असून जून महिन्यात राज्यात सरासरीपेक्षा कमी पावसाची नोंद झाली आहे, ज्यामुळे शेतीकामेही खोळंबली आहेत.