इराणविरुद्धच्या लष्करी मोहिमेला स्थगिती

अमेरिकन सिनेट सभागृहाने राष्ट्राध्यक्ष डोनाल्ड ट्रम्प यांच्या इराणविरोधी लष्करी मोहिमेला स्थगिती देणारे विधेयक मंजूर केले आहे. अमेरिकन काँग्रेसच्या मंजुरीशिवाय इराणविरोधात कोणतीही नवीन लष्करी कारवाई करता येणार नाही. राष्ट्राध्यक्ष ट्रम्प यांच्या युद्ध घोषित करण्याच्या अमर्याद अधिकारांवर या विधेयकाद्वारे कायदेशीर अंकुश लावण्यात आला आहे. सिनेट सभागृहामध्ये या प्रस्तावावर अत्यंत चुरशीचे मतदान पार पडले. हा प्रस्ताव ५० विरुद्ध ४८ मतांनी मंजूर करण्यात आला. वरिष्ठ सभागृहातील सत्ताधारी रिपब्लिकन पक्षाचे बहुमत असतानाही पक्षाच्या चार खासदारांनी विरोधी पक्षाच्या बाजूने मतदान केले. अमेरिकेच्या संसदेच्या दोन्ही सभागृहांनी युद्ध अधिकारांशी संबंधित प्रस्ताव मंजूर करण्याची ही ऐतिहासिक पहिलीच वेळ ठरली आहे. सद्यस्थितीत पश्चिम आशियामध्ये अमेरिकेचे मर्यादित लष्करी अस्तित्व कायम ठेवण्यास मुभा देण्यात आली आहे. अमेरिका किंवा मित्रराष्ट्रांवर संभाव्य हल्ले रोखण्यासाठी ही सवलत असेल. अमेरिकन राज्यघटनेनुसार युद्ध पुकारण्याचा अंतिम अधिकार संसदेला दिला आहे.