स्वतंत्र बातमी

मुंबई-गोवा महामार्गाचे रखडलेले काम आणि त्यामुळे पहिल्याच पावसात संगमेश्वर बाजारपेठेची झालेली दुरवस्था ही शासकीय यंत्रणा आणि कंत्राटदारांच्या बेजबाबदारपणाचा कळस आहे. कोकणचा कॅलिफोर्निया करण्याच्या गप्पा मारणारे लोकप्रतिनिधी आणि प्रशासन जमिनीवरील या वास्तवाकडे कधी लक्ष देणार, हा मोठा प्रश्न आहे. रस्ता रुंदीकरण करताना नैसर्गिक पाण्याचे प्रवाह बुजवणे हा निव्वळ मूर्खपणा असून, त्याचा फटका आज स्थानिक प्रामाणिक करदात्या व्यापाऱ्यांना बसत आहे. दुकानांमध्ये २ ते ३ फूट पाणी साचून लाखो रुपयांचा माल खराब होणे ही मानवनिर्मित आपत्ती आहे. पावसाळा सुरू होण्यापूर्वी नालेसफाई आणि पाणी निचऱ्याचे ‘ऑडिट’ का केले गेले नाही? कंत्राटदार कंपनीच्या नफेखोरीमुळे आणि अधिकार्‍यांच्या दुर्लक्षामुळे दरवर्षी कोकणच्या जनतेला हा त्रास सहन करावा लागत आहे. सरकारने या नुकसानीची तात्काळ दखल घेऊन व्यापाऱ्यांना भरपाई दिली पाहिजे आणि संबंधित कंत्राटदारावर कडक दंडात्मक कारवाई केली पाहिजे, तरच या यंत्रणांना शिस्त लागेल.