स्वतंत्र बातमी

जिल्ह्यातील सर्वच तालुक्यांमध्ये मान्सूनची कामगिरी अत्यंत निराशाजनक राहिली असून पाणी टंचाईचे संकट वाढले आहे.

ठाणे जिल्ह्याची जीवनवाहिनी समजल्या जाणाऱ्या बारवी धरण क्षेत्रात जून महिन्यात अपेक्षित पाऊस झालेला नाही. गेल्या वर्षी जून महिन्याच्या अखेरीस या धरणात ५३.९२ टक्के इतका समाधानकारक पाणीसाठा उपलब्ध होता. यंदा मात्र धरण क्षेत्रात पाऊस न पडल्याने हा साठा अवघ्या २१.५९ टक्क्यांवर आला आहे. संपूर्ण कोकण विभागाचा विचार करता ३० जूनपर्यंत केवळ ३७३.३ मिलिमीटर पाऊस झाला असून गेल्या वर्षी हा आकडा ६६६.१ मिलिमीटर होता. म्हणजेच कोकणात सरासरीच्या केवळ ५६.३ टक्के पर्जन्यमान झाले आहे. ठाणे जिल्ह्यात जूनअखेरपर्यंत एकूण सरासरीच्या केवळ २७.४ टक्के पाऊस पडल्याचे स्पष्ट झाले आहे. ठाणे तालुक्यात सर्वाधिक २२४.६ मिलिमीटर पाऊस पडला असून कल्याण, शहापूर आणि अंबरनाथ भागात परिस्थिती बिकट आहे.