स्वतंत्र बातमी

अतिवृष्टीच्या काळात समृद्धी महामार्गावर अपघात रोखण्यासाठी प्रशासनाने विशेष कृती आराखडा तयार केला आहे. महामार्ग पोलीस आणि सुरक्षा यंत्रणेने मुख्य प्रवेशद्वारांवर तपासणी सुरू केली आहे.

नाशिक जिल्ह्यात निर्माण झालेल्या हवामान आणीबाणीमुळे जनजीवन सुरक्षित ठेवण्यासाठी अभूतपूर्व पावले उचलण्यात आली आहेत. त्र्यंबकेश्वर, इगतपुरी, नाशिक ग्रामीण, पेठ आणि दिंडोरी या तालुक्यांमध्ये मुसळधार पावसाचा जोर अधिक राहण्याचा अंदाज आहे. खबरदारीचा उपाय म्हणून दुगारवाडी धबधबा, हरिहर गड आणि पहिने परिसरातील सर्व पर्यटनस्थळे तात्काळ बंद केली आहेत. या संवेदनशील ठिकाणी पर्यटकांनी गर्दी करू नये यासाठी पोलीस आणि होमगार्डचा बंदोबस्त तैनात करण्यात आला आहे. सर्वात महत्त्वाचे म्हणजे लाखो भाविकांचे श्रद्धास्थान असलेले त्र्यंबकेश्वर ज्योतिर्लिंग मंदिर आणि वणी येथील सप्तश्रृंगी देवीचे मंदिर सुरक्षेच्या कारणास्तव तात्पुरते बंद ठेवण्यात आले आहे. भाविकांनी या काळात नाशिक जिल्ह्याचा प्रवास टाळावा असे आवाहन प्रशासनाने केले आहे.