स्वतंत्र बातमी

कल्याण-मुरबाड मार्गावरील एसटी बससेवेच्या फेऱ्यांमध्ये करण्यात आलेली वाढ प्रवाशांसाठी मोठा दिलासा ठरली. या निर्णयाला नागरिकांकडून उत्स्फूर्त प्रतिसाद मिळत आहे. यापूर्वी ५ मे पर्यंत कल्याण आगारातून या मार्गावर दररोज ४८ फेऱ्या चालवल्या जात होत्या. त्यावेळी दररोज सरासरी २ हजार २३८ प्रवासी प्रवास करत होते. वाढत्या गर्दीच्या तुलनेत फेऱ्या अपुऱ्या पडत असल्याने नागरिक अवैध वाहतुकीचा आधार घेत होते. एका भीषण अपघाताची गंभीर दखल घेत परिवहन मंत्री प्रताप सरनाईक यांनी फेऱ्या वाढवण्याचे निर्देश दिले. यानंतर फेऱ्या ४८ वरून थेट १०८ करण्यात आल्या. सद्यस्थितीत ५ हजार ८० हून अधिक नागरिक या सेवेचा लाभ घेत आहेत. प्रवाशांच्या सोयीसाठी ‘राजमाता जिजाऊ’ बसेस सेवेत दाखल झाल्या आहेत.

कल्याण-मुरबाड मार्गावरून पुढे उंबर आणि अहिल्यानगर भागाकडे जाणाऱ्या इतर आगारांच्या एसटी बसमध्येही स्थानिक प्रवाशांना चढ-उताराची सोय दिली. मुरबाड ते सरळगाव परिसरातील नागरिकांची यामुळे मोठी सोय झाली. अवैध टॅक्सी आणि रिक्षांमधील धोकादायक प्रवासातून नागरिकांची सुटका झाली. सार्वजनिक वाहतूक व्यवस्था मजबूत झाल्यामुळे नोकरदार, विद्यार्थी आणि महिला प्रवाशांनी या निर्णयाचे स्वागत केले. मागणीनुसार इतर मार्गांवरही एसटी फेऱ्या वाढवण्याचे नियोजन महामंडळ करत आहे.