बदलापूर परिसरातील काळी, चिकण माती आणि सह्याद्रीच्या पायथ्याशी असलेले विशिष्ट हवामान यामुळे येथील जांभूळ गोडी, आकार आणि औषधी गुणधर्मांसाठी संपूर्ण महाराष्ट्रात ओळखले जाते. जांभूळ हे मधुमेह नियंत्रण, रक्तशुद्धी आणि पचनक्रियेसाठी आयुर्वेदात अत्यंत मौल्यवान मानले जाते. मात्र हे फळ तोडल्यानंतर अवघ्या दोन-तीन दिवसांत खराब होते, त्यामुळे प्रक्रिया उद्योगाशिवाय त्याचे मूल्य वाढवणे कठीण होते. हे संशोधन केंद्र नेमक्या याच समस्येवर तोडगा काढणार आहे.