स्वतंत्र बातमी

मुंबईच्या बेस्ट बसच्या धर्तीवर ठाणे परिवहन उपक्रमाच्या ताफ्यातही आता दुमजली बसगाड्यांचे आगमन झाले आहे. टीएमटीच्या ताफ्यातील पहिली वातानुकूलित विद्युत दुमजली बस ठाण्यात दाखल झाली. घोडबंदर रोडवरील आनंदनगर आगारात ही बस दाखल झाली असून, येत्या पंधरा दिवसांत ती प्रवाशांच्या सेवेत रुजू होईल.

ठाणे शहरातील वाढती लोकसंख्या आणि वाहतूक कोंडी लक्षात घेता, प्रशासनाने प्रशस्त अशा घोडबंदर मार्गाची निवड या बससाठी केली आहे. घोडबंदर रोड हा रुंद असल्याने आणि तिथे पुरेशी उंची उपलब्ध असल्याने, दुमजली बस चालवणे सोपे होणार आहे. प्राथमिक माहितीनुसार, ही बस ठाणे स्टेशन ते आनंदनगर – घोडबंदर या मार्गावर धावण्याची शक्यता आहे. यामुळे या मार्गावरील प्रवाशांना उन्हाळ्याच्या दिवसांत थंडगार आणि सुखद प्रवासाचा अनुभव घेता येईल. टीएमटी प्रशासनाने एकूण दहा वातानुकूलित विद्युत दुमजलीबसेस खरेदी करण्याचा निर्णय घेतला आहे. यातील पहिली बस दाखल झाली असून, उर्वरित नऊ बसेस येत्या काही महिन्यांत टप्प्याटप्प्याने ताफ्यात येतील.

परिवहन व्यवस्थापक भालचंद्र बेहेरे यांनी दिलेल्या माहितीनुसार, या बसची आरटीओ नोंदणी प्रक्रिया सध्या सुरू आहे. ही प्रक्रिया पूर्ण होताच साधारण दोन आठवड्यांत ही बस रस्त्यावर धावेल. पर्यावरणपूरक वाहतुकीला प्रोत्साहन देण्यासाठी केंद्र सरकारच्या राष्ट्रीय स्वच्छ हवा कार्यक्रमांतर्गत ठाणे महापालिकेला निधी प्राप्त झाला आहे. टीएमटीकडे सध्या चारशे सात बसेस असून त्यापैकी तीनशे एक्याऐंशी प्रत्यक्ष धावत आहेत. ताफ्यातील बसेसची संख्या सातशे सत्याहत्तर पर्यंत नेण्याचे लक्ष्य आहे. लवकरच शंभर वातानुकूलित विद्युत बसेस आणि शंभर सीएनजी बसेस ताफ्यात दाखल होणार आहेत. मुंबईच्या दुमजली बसचे ठाणेकरांना नेहमीच आकर्षण राहिले आहे. आता आपल्या स्वतःच्या शहरात अशी आधुनिक बस धावणार असल्याने नागरिकांमध्ये आनंदाचे वातावरण आहे. विशेषतः शालेय विद्यार्थी आणि नोकरदार वर्गासाठी ही बस आकर्षणाचे केंद्र ठरेल. ही बस केवळ प्रवासाचे साधन न राहता, ठाणे शहराच्या आधुनिक सार्वजनिक वाहतुकीचे प्रतीक ठरणार आहे.