जयगड – सातारा महामार्गाला गती

पश्चिम महाराष्ट्र आणि कोकण यांना जोडणारे सध्याचे रस्ते अरुंद आणि घाटांमधून जातात. सातारा ते जयगड प्रवासासाठी सध्या तब्बल पाच तास लागतात. जयगड हे राज्यातील महत्त्वाचे आणि सर्व हवामानांत सुरू असणारे खाजगी बंदर आहे. या बंदराचा विकास वेगाने होत असताना पश्चिमेकडील जिल्ह्यांशी थेट जोडणी नसणे ही मुख्य अडचण होती. केंद्र सरकारने या समस्येवर मात करण्यासाठी जयगड-चिपळूण-सातारा द्रुतगती महामार्ग उभारण्याचा निर्णय घेतला. सल्लागार संस्थेची निवड झाल्यानंतर पुढील काही महिन्यांत सविस्तर प्रकल्प आराखडा तयार केला जाईल. त्यामध्ये भूसंपादनाचा प्रत्यक्ष खर्च, विस्थापितांची संख्या आणि बाधित वृक्षांची माहिती समोर येईल. आराखड्याला केंद्र सरकारची अंतिम मंजुरी मिळाल्यानंतर प्रत्यक्ष भूसंपादन आणि निविदा प्रक्रियेचा पुढील टप्पा गाठला जाईल.