स्वतंत्र बातमी

राज्यात मृग नक्षत्राच्या काळात फळधारणा होणाऱ्या पिकांसाठी हवामान आधारित फळपीक विमा योजना राबवण्यात येते. गतवर्षी ५२ हजार १२१ शेतकऱ्यांनी या योजनेत सहभाग घेतला होता. यंदा नोंदणीत ३३ हजार २६२ ने वाढ झाली आहे. नांदेड जिल्ह्यात सर्वाधिक १४ हजार १३ शेतकऱ्यांनी सहभाग नोंदवला आहे. हिंगोलीत १२ हजार ५१८ आणि परभणीत १२ हजार २३० शेतकऱ्यांनी अर्ज भरले आहेत. कोकण आणि पश्चिम महाराष्ट्रातील काही जिल्ह्यांत प्रतिसाद अल्प मिळाला आहे. ठाण्यात फक्त ५, कोल्हापुरात २२ आणि लातूरमध्ये ६१ शेतकऱ्यांनी नोंदणी केली आहे. सीताफळ, अंजीर, द्राक्ष, पेरू, लिंबू, मोसंबी, संत्रा, डाळिंब, चिकू तसेच हळद या पिकांचा विमा उतरवण्यात आला आहे.

हवामानातील अनिश्चिततेमुळे होणाऱ्या नुकसानापासून संरक्षण मिळण्यासाठी शेतकरी या योजनेचा आधार घेतात. ५० हजार ९२८ हेक्टर क्षेत्रातील पिकांना ७१९ कोटी ६२ लाख रुपयांचे संरक्षण मिळाले आहे. शेतकरी, केंद्र शासन आणि राज्य शासन यांच्या संयुक्त योगदानातून ८० कोटी १६ लाख रुपयांचा विमा हप्ता भरण्यात आला आहे. विमा कवचामुळे अवकाळी पाऊस, गारपीट किंवा किडीच्या प्रादुर्भावामुळे होणाऱ्या संभाव्य आर्थिक हानीपासून दिलासा मिळण्यास मदत होते. कृषी विभागाने सर्व अर्जांची छाननी करून अंतिम डेटा डिजिटल प्रणालीवर नोंदवला आहे.