स्वतंत्र बातमी

महानगरपालिकेच्या सुधारित अर्थसंकल्पात नागरी विकासावर भर देण्यात आला आहे. बांधकाम विभागासाठी सर्वाधिक १,६०७ कोटी २१ लाख रुपयांचा निधी राखून ठेवण्यात आला आहे. शहराच्या पाणीपुरवठा विभागासाठी ४७२ कोटी ३८ लाख रुपये देण्यात आले आहेत. घनकचरा व्यवस्थापनासाठी ३१७ कोटी ८२ लाख रुपये मंजूर केले आहेत. वैद्यकीय आरोग्य सेवा बळकट करण्यासाठी १९४ कोटी ५६ लाख रुपये खर्च केले जातील. प्राथमिक शिक्षण विभागासाठी १७४ कोटी रुपये तसेच भुयारी गटार योजनेसाठी १६३ कोटी रुपये निश्चित केले आहेत. विद्युत व्यवस्थेसाठी १४६ कोटी आणि अग्निशमन यंत्रणेसाठी ८२ कोटी रुपयांचा निधी उपलब्ध आहे.

शहराच्या भविष्याचा विचार करून अनेक नवीन प्रकल्पांची घोषणा या अर्थसंकल्पात झाली आहे. शिलार धरण प्रकल्पासाठी १५० कोटी रुपयांची तरतूद करण्यात आली आहे. हिरकणी माता बालसंगोपन रुग्णालयासाठी ७० कोटी रुपये दिले आहेत. प्राथमिक शाळांच्या बांधकामासाठी ७६ कोटी रुपये खर्च केले जातील. दिव्यांग कल्याणासाठी ४८ कोटी ९१ लाख रुपये राखून ठेवले आहेत. मागासवर्गीय कल्याणासाठी ४६ कोटी आणि महिला बालविकास विभागासाठी ३१ कोटी ६५ लाख रुपयांचा निधी दिला आहे. नवीन अग्निशमन केंद्र, सौर ऊर्जा प्रकल्प आणि नवीन जलशुद्धीकरण केंद्रासाठी स्वतंत्र आर्थिक तरतूद केली आहे.