केंद्रीय अर्थमंत्री निर्मला सीतारामन यांनी शुक्रवारी पुण्यातील खराडी औद्योगिक विकास महामंडळ क्षेत्रात भारतीय स्टेट बँकेच्या महाराष्ट्र वर्तुळाच्या नवीन स्थानिक प्रधान कार्यालयाचे उद्घाटन केले. मुंबई आणि राज्याचा किनारपट्टी विभाग वगळता महाराष्ट्रातील उर्वरित सर्व जिल्ह्यांवर या कार्यालयाचे नियंत्रण राहणार आहे. या कार्यक्रमाला राज्यसभा खासदार मेधा कुलकर्णी, केंद्रीय वित्त सेवा विभागाचे सचिव म. नागराज आणि भारतीय स्टेट बँकेचे अध्यक्ष चल्ला श्रीनिवासुलु शेट्टी उपस्थित होते. याप्रसंगी अर्थमंत्र्यांच्या हस्ते नवीन इमारतीचे चित्र असलेले स्मरणार्थ टपाल तिकीटही प्रकाशित करण्यात आले.
या उद्घाटन सोहळ्यात बोलताना सीतारामन म्हणाल्या की, बँका जेव्हा जागतिक स्तरावर विस्तारतात, तेव्हाही त्यांनी ग्राहकांशी जवळचे नाते कायम ठेवणे आवश्यक आहे. जागतिक विकास साधतानाच स्थानिक गरजा पूर्ण केल्या तरच खऱ्या अर्थाने प्रगती शक्य आहे, असे त्यांनी ठामपणे सांगितले. भारतीय अर्थव्यवस्थेचा उल्लेख करताना त्यांनी सांगितले की, देशाची मजबूत अंतर्गत बाजारपेठ हे भारतीय अर्थव्यवस्थेच्या लवचीकतेचे एक प्रमुख कारण आहे. सध्या जागतिक परिस्थिती कठीण असली तरी भारतीय निर्यातदार नवीन बाजारपेठा शोधून आपले काम सुरू ठेवत आहेत, याचे त्यांनी कौतुक केले.
बँकांनी ऊस उद्योग, माहिती तंत्रज्ञान आणि नव-उद्योग यांसारख्या पारंपरिक क्षेत्रांपलीकडे जाऊन दुर्लक्षित आणि अपरिचित क्षेत्रांना समजून घेण्याची गरज असल्याचे सीतारामन यांनी बजावले. महाराष्ट्रात असंख्य लघु व मध्यम उद्योग समूह आणि पारंपरिक उद्योग आहेत, ज्यांना आधुनिकीकरणाची नितांत आवश्यकता आहे. पूर्व आणि आग्नेय महाराष्ट्रातील विणकाम आणि तेल घाणा यांसारख्या छोट्या उद्योगांना बँकांनी भक्कम पाठबळ द्यावे, असे त्यांनी आवाहन केले. उत्पादन, कृषी, पर्यटन आणि माहिती तंत्रज्ञान या क्षेत्रांना सातत्याने आधार देणे भारताच्या विकासगतीसाठी अत्यावश्यक असल्याचेही त्यांनी अधोरेखित केले.
कृत्रिम बुद्धिमत्तेमुळे उद्भवणाऱ्या सायबर धोक्यांबाबत बोलताना सीतारामन म्हणाल्या की, भारतीय बँका दशकांपासून सातत्यपूर्ण डिजिटलायझेशन, नियमित यंत्रणा उन्नयन आणि ग्राहक सुरक्षा उपायांमुळे सायबर प्रकरणांपासून सुरक्षित राहिल्या आहेत. मात्र, कृत्रिम बुद्धिमत्तेकडून येणारे आव्हान वेगळ्या स्वरूपाचे आणि कमी समजलेले आहे. त्यासाठी सरकारने भारतीय स्टेट बँकेचे अध्यक्ष शेट्टी यांच्या नेतृत्वाखाली एक समिती स्थापन केली असून, मायथॉस या कृत्रिम बुद्धिमत्ता मंचाशी निगडित धोके आणि त्यांवरील उपायांचे मूल्यांकन या समितीकडून केले जाणार आहे.
सन 2047 पर्यंत विकसित भारत घडवण्याच्या राष्ट्रीय ध्येयाचा उल्लेख करत सीतारामन यांनी सांगितले की, भविष्यातील आव्हानांना सामोरे जाण्यासाठी बँकिंग क्षेत्रात आमूलाग्र बदल करणे अत्यावश्यक आहे. त्यादृष्टीने बँकिंग क्षेत्रातील सुधारणांसाठी शिफारशी करणाऱ्या एका समितीची स्थापना करण्याचे नियोजन असल्याचे त्यांनी जाहीर केले. देशाची अंतर्गत अर्थव्यवस्था कृषी, उद्योग आणि सेवा क्षेत्र भक्कम राहिले तरच भारत जागतिक अनिश्चिततेच्या काळातही मजबूत राहील, असा विश्वास त्यांनी व्यक्त केला.