स्वतंत्र बातमी

अन्न आणि औषध प्रशासन विभागाच्या वतीने सुरू केलेल्या ‘सेफ फूड-सेफ महाराष्ट्र’ ऑनलाईन तक्रार प्रणालीला नाशिक जिल्ह्यात उदंड प्रतिसाद लाभला आहे. १५ जुलैपासून अवघ्या १२ दिवसांत नागरिकांनी १२४ पेक्षा जास्त ऑनलाईन तक्रारी नोंदवल्या आहेत. यामध्ये उपहारगृहांमधील अस्वच्छतेबाबत १६ तक्रारी प्राप्त झाल्या. अन्नपदार्थांमध्ये बाह्य घातक घटक आढळल्याच्या १२ तक्रारींची नोंद झाली. निकृष्ट दर्जाचे पॅकबंद अन्न आणि पॅकिंगमधील त्रुटींच्या २८ तक्रारी ऑनलाईन दाखल झाल्या. मुदतबाह्य अन्नपदार्थांची विक्री केल्याप्रकरणी १३ अर्ज आले. दूध आणि दुग्धजन्य पदार्थांमधील भेसळीबाबत १३ तक्रारी नोंदवण्यात आल्या. खाद्यतेल तसेच तुपातील भेसळीच्या ३ तक्रारी प्राप्त झाल्या. दिशाभूल करणारे लेबल, निकृष्ट दर्जाचे जेवण आणि बंदी घातलेल्या अन्नपदार्थांच्या विक्रीबाबत अनेक तक्रारी दाखल झाल्या आहेत. ऑनलाईन प्रणालीमुळे तक्रारींची सत्यता पडताळणी करणे आणि कारवाईचा अहवाल तक्रारदारापर्यंत पोहोचवणे सुलभ झाले आहे.

नागरिकांकडून प्राप्त ऑनलाईन अर्जांच्या आधारे अन्न व औषध प्रशासनाने मालेगाव तालुक्यात धडक तपासणी मोहीम राबवली. शासकीय मान्यताप्राप्त संगमेश्वर ताडी विक्री केंद्रासह येसगाव, वडनेर आणि वडेल येथील विक्री केंद्रांवर अचानक छापे टाकले. या तपासणी दरम्यान ठिकठिकाणी अस्वच्छता आढळून आली. अन्न सुरक्षेच्या कायदेशीर नियमांचे उघडपणे उल्लंघन झाल्याचे स्पष्ट झाले. रासायनिक आणि मानवी आरोग्यास घातक भेसळ झाल्याच्या संशयावरून पथकाने २,३०२ लिटर ताडीचा साठा ताब्यात घेतला. जप्त केलेल्या ताडीची एकूण किंमत ७१ हजार २० रुपये आहे. हा संपूर्ण साठा अधिकाऱ्यांच्या उपस्थितीत नष्ट करण्यात आला. अन्न भेसळ रोखण्यासाठी विशेष अन्न सुरक्षा अधिकाऱ्यांचे पथक संपूर्ण नाशिक विभागात कार्यरत ठेवले आहे. संशयास्पद ताडी विक्री केंद्रांचे नमुने प्रयोगशाळेत तपासणीसाठी पाठवण्यात आले आहेत.