स्वतंत्र बातमी

मुंबईत जून महिन्यात सरासरीच्या तुलनेत अत्यंत कमी पाऊस झाला होता. जूनच्या शेवटच्या आठवड्यात मान्सून दाखल झाला असला तरी पाण्याची तूट कायम होती. गेल्या वर्षीच्या तुलनेत तलावांमधील पाणीसाठा यंदा कमालीचा घटला आहे. मुंबई शहराला अप्पर वैतरणा, मध्य वैतरणा, भातसा, तानसा, तुळशी, मोडक सागर आणि विहार या सात तलावांमधून पाणीपुरवठा केला जातो. जून महिना कोरडा गेल्याने मुंबईवर पाणी कपातीचे मोठे संकट निर्माण झाले आहे. महापालिकेने यापूर्वीच शहरात पाणी कपात लागू करण्याबाबत बैठका घेतल्या आहेत. आता सुरू झालेल्या मुसळधार पावसामुळे तलावांच्या पाणलोट क्षेत्रात पाण्याची आवक सुरू झाली आहे. हवामान खात्याने जुलै महिन्यात सरासरीपेक्षा कमी पावसाचा अंदाज वर्तवला असला तरी या सुरुवातीच्या मुसळधार सरींमुळे पाणी टंचाईची तीव्रता काही प्रमाणात कमी होण्यास मदत मिळणार आहे.