सर्वाधिक प्रदूषित शहरांची यादी

सोमवारी समोर आलेल्या हवेच्या गुणवत्तेच्या आकडेवारीनुसार भारतामधील तेरा शहरे जागतिक स्तरावर सर्वात प्रदूषित ठरली आहेत. उत्तर प्रदेशातील बुलंदशहरने जगात तिसरे स्थान पटकावले आहे.

देशातील विविध राज्यांमधील शहरांमध्ये हवेची गुणवत्ता खालावली आहे. उत्तर प्रदेश, राजस्थान, मध्य प्रदेश, हरियाणा आणि महाराष्ट्रातील मुंबई शहरात प्रदूषणाचे प्रमाण उच्च पातळीवर पोहोचले आहे. राजस्थानातील पाली, उत्तर प्रदेशातील मुझफ्फरनगर, मध्य प्रदेशातील बुरहानपूर येथे एक्यूआय निर्देशांक १७४ नोंदवला गेला. हरियाणातील रोहतकचा निर्देशांक १७२ होता. राजस्थानातील कोटा शहराचा निर्देशांक १७० नोंदवला गेला. महाराष्ट्राची आर्थिक राजधानी असणाऱ्या मुंबई शहरात एक्यूआय निर्देशांक १६७ नोंदवला गेला. हापूर, हिसार, बिकानेर आणि बरेली या शहरांमध्ये हवेची गुणवत्ता धोक्याच्या पातळीवर पोहचली आहे. औद्योगिक प्रदूषण, वाहनांचा धूर आणि भौगोलिक परिस्थितीमुळे प्रदूषणात वाढ झाली आहे. नागरिकांच्या आरोग्याचे रक्षण करण्यासाठी प्रतिबंधात्मक उपाय राबवणे गरजेचे बनले आहे.