स्वतंत्र बातमी

अकोल्यात तापमानाचा पारा चाळीस पूर्णांक नऊ अंश सेल्सिअसवर पोहोचला आहे. हा आठ मार्च या दिवसातील देशातील उच्चांक ठरला आहे. सध्या केवळ अकोलाच नव्हे, तर संपूर्ण विदर्भ आणि मराठवाड्यात उन्हाच्या झळा तीव्र झाल्या आहेत. भारतीय हवामान विभागाने दिलेल्या माहितीनुसार, विदर्भातील अनेक जिल्ह्यांमध्ये तापमान चाळीस अंशांच्या आसपास आहे. वाशिम जिल्ह्यात कडक ऊन पडत असून तिथे एकोणचाळीस पूर्णांक सहा अंश सेल्सिअस तापमानाची नोंद करण्यात आली आहे. अमरावती आणि वर्धा या दोन्ही शहरांमध्ये एकाच पातळीवर म्हणजेच एकोणचाळीस पूर्णांक दोन अंश सेल्सिअस इतके तापमान नोंदवले गेले आहे. परभणीत उष्णता जाणवत असून तिथे तापमान अडतीस पूर्णांक चार अंश सेल्सिअस इतके आहे. पुणे परिसरात देखील उन्हाची तीव्रता अधिक असून तिथे तापमान एकोणचाळीस पूर्णांक नऊ अंश सेल्सिअसपर्यंत पोहोचले आहे. तर मुंबई येथे तुलनेने कमी म्हणजेच पस्तीस पूर्णांक आठ अंश सेल्सिअस तापमान नोंदवण्यात आले आहे.

हवामान विभागाने अकोला, अमरावती आणि वर्धा या जिल्ह्यांमध्ये उष्णतेच्या लाटेची स्थिती निर्माण झाल्याचे स्पष्ट केले आहे. पुढील दोन दिवस विदर्भ, मराठवाडा आणि मध्य महाराष्ट्रात हीच स्थिती कायम राहण्याची शक्यता असल्याने हवामान विभागाने यलो अलर्ट दिला आहे. जमिनीतील ओलावा कमी झाल्यामुळे आणि प्रखर सूर्यप्रकाशामुळे दिवसासह रात्रीही उष्णता जाणवत आहे. विदर्भात कोरडी उष्णता असताना, मुंबईसह कोकण किनारपट्टीवर मात्र दमट हवामानाचा प्रभाव आहे. हवेतील आर्द्रता वाढल्याने नागरिकांना घामाच्या धारा आणि प्रचंड उकाड्याचा सामना करावा लागत आहे.

हवामान तज्ज्ञ डॉ. अनुपम कश्यपी यांनी दिलेल्या माहितीनुसार, उष्णतेचा हा तडाखा काही काळ टिकून राहील. मात्र, वातावरणात बदल होण्याची चिन्हे आहेत. बारा मार्चपासून उत्तर भारतातून मध्य भारताच्या दिशेने थंड वारे येण्याची शक्यता आहे. बंगालच्या उपसागरावरून येणाऱ्या बाष्पयुक्त वाऱ्यांमुळे पुढील आठवड्याच्या अखेरीस काही ठिकाणी पावसाचा अंदाज आहे. या पावसामुळे तापमानात घट होऊन नागरिकांना काहीसा दिलासा मिळू शकतो. वाढत्या तापमानामुळे उष्माघाताचा धोका वाढला असून, नागरिकांनी खालील काळजी घेणे आवश्यक आहे. दुपारी बारा ते चार या वेळेत शक्यतो घराबाहेर पडणे टाळावे. भरपूर पाणी, लिंबू सरबत, ताक आणि नैसर्गिक पेयांचे सेवन करावे. बाहेर पडताना डोक्यावर टोपी, स्कार्फ किंवा छत्रीचा वापर करावा. प्रवासात पाण्याची बाटली सोबत ठेवावी, असा सल्ला वैद्यकीय तज्ञांनी दिला आहे.