उष्णतेमुळे उत्तर कोरियात समुद्रकिनारी गर्दी

कोरियन द्वीपकल्पात सध्या भीषण उष्णतेची लाट पसरली आहे. उत्तर कोरियातील प्योंगयांग, प्योंगान आणि जागांग या प्रांतांमध्ये दिवसभरातील तापमान ३५ ते ४० अंश सेल्सिअसदरम्यान नोंदवले गेले आहे. राजधानी प्योंगयांगमध्ये रात्रीचे तापमान २५ अंश सेल्सिअसच्या खाली न आल्याने नागरिकांना प्रचंड उकाड्याचा सामना करावा लागत आहे. या उष्णतेपासून दिलासा मिळवण्यासाठी हजारो नागरिक पूर्व किनाऱ्यावरील नव्याने विकसित केलेल्या वोन्सान काल्मा तटीय पर्यटन क्षेत्रात पोहोचले आहेत. १ जुलैपासून हे पर्यटन क्षेत्र खुले झाले असून तिथे समुद्रकिनारे आणि जलउद्यानांमध्ये नागरिकांची मोठी गर्दी दिसून येत आहे. सरकारी माध्यमांनी प्रसारित केलेल्या चित्रांमध्ये नागरिक समुद्रकिनारी जलक्रीडेचा आनंद घेताना दिसत आहेत.

उत्तर कोरियाच्या मध्यवर्ती प्रशासनाने वाढत्या तापमानामुळे आरोग्य यंत्रणांना सतर्क राहण्याचे आदेश दिले आहेत. उष्माघात आणि उकाड्यामुळे होणारे आजार रोखण्यासाठी नागरिकांना दुपारच्या वेळी बाहेरील कामे टाळण्याच्या सूचना देण्यात आल्या आहेत. वाढत्या तापमानाचा आणि उच्च आर्द्रतेचा फटका पिकांना बसू नये यासाठी शेतकर्‍यांना विशेष खबरदारी घेण्यास सांगितले आहे. सरकारी वृत्तवाहिनी कोरियन सेंट्रल टेलिव्हिजनने प्योंगयांगमधील वॉटर पार्क आणि पोहण्याच्या तलावांवरील गर्दीची दृश्ये दाखवली आहेत. हवामान खात्याच्या अंदाजानुसार चालू आठवड्यातही उष्णतेची ही लाट अशीच कायम राहण्याची शक्यता आहे.