स्वतंत्र बातमी

रत्नागिरी जिल्ह्यात पाणीटंचाईची समस्या दिवसेंदिवस अधिक गंभीर होत चालली आहे. एप्रिल महिना संपत आला असताना जिल्ह्यातील नदी, नाले आणि धरणांतील पाण्याची पातळी झपाट्याने खालावत आहे. नऊ तालुक्यांपैकी सहा तालुक्यांमध्ये बारा खासगी आणि तीन शासकीय अशा एकूण पंधरा टँकरच्या माध्यमातून नागरिकांची तहान भागवली जात आहे. मंडणगड, चिपळूण, खेड आणि रत्नागिरी या चार तालुक्यांमध्ये पाणीटंचाईचे प्रमाण सर्वाधिक आहे, तर लांजा, राजापूर आणि गुहागर या तीन तालुक्यांमध्ये अद्याप टँकरद्वारे पाणीपुरवठा सुरू करण्याची वेळ आलेली नाही.

जिल्ह्यातील बत्तीस गावांमधील अठहत्तर वाड्यांवर सहाशे बाऐंशी टँकर फेऱ्या होत असून सत्तावीस हजार आठशे बत्तीस नागरिक पाणीटंचाईने बाधित झाले आहेत. पाण्यासाठी नागरिकांना मोठी कसरत करावी लागत आहे. उन्हाची दाहकता वाढत असताना पाण्याचे दुर्भिक्ष्य अधिकाधिक जाणवू लागले आहे. गावागावात आणि वाड्यावस्त्यांवर टँकरद्वारे पाणीपुरवठा करण्यात येत असला तरी ही व्यवस्था अपुरी पडत असल्याची भावना नागरिकांमध्ये आहे.

रत्नागिरी तालुक्यात शिरगाव येथील राधाकृष्णनगर, तिवंडेवाडी, स्वरूपानंदनगर, अजमेरीनगर, आझादनगर, राजनगर, प्रशांतनगर, नायाबनगर, लक्ष्मीनगर, साईभूमीनगर, सडामिन्या-चौसोपीवाडी, गवाणवाडी, मचलावठार, खालचावठार, आनंदनगर, मिन्याबंदर, खालगाव-बौद्धवाडी, गोताडवाडी, काकादेवी बाजारपेठ, वरची म्हादवेवाडी, विठलवाडी, मिरजोळे-मधलीवाडी, भक्तीकुंज तसेच नाचणे येथील आदिनाथनगर, सोमेश्वर-पांळदेवाची, गुरववाडी आणि खेडशो-नवाथे परिसरातील श्रीनगर, एकतानगर, गणेशनगर, लक्ष्मीनारायणनगर, मथुरापार्क, सरस्वतीनगर, सौम्यापार्क या वाड्यावस्त्यांना टँकरद्वारे पाणी पुरवले जात आहे.

मंडणगड तालुक्यातील वाल्मीकीनगर, कौडगाव, भोळवळी, देवाचा डोंगर, खेड-बोरटोक, बंगळा, खालची धनगरवाडी, बरची धनगरवाडी, भराडेवाडी, भोसलेवाडी, मांगलेवाडी, बोरवाडी, पालांडेवाडी, खांडेकरवाडी, वनगरवाडी, बौद्धवाडी या ठिकाणी टँकर पाणी पुरवठा सुरू आहे. चिपळूण तालुक्यातील डेरवण-धनगरवाडी, चव्हाणवाडी, कुडप धनगरवाडी, कातळवाडी, मधलीवाडी, अनारी-धनगरवाडी, कोंडमळा-धनगरवाडी, नारळेवाडी, मोकासवाडी, गंगेचेवडी, जुनावडेवाडी, राडेवाडी, अडरे-धनगरवाडी, सावर्डे-धनगरवाडी, टेरव-धनगरवाडी या गावांनाही टँकरचा आधार घ्यावा लागत आहे. संगमेश्वर तालुक्यातील दंडगवळवाडी, धनगरवाडी, नोरदवाडी, जखीनटेप, सहाणेचीवाडी आणि दापोली तालुक्यातील कोळीवाडा येथेही पाणीटंचाई जाणवत आहे.

उन्हाळ्याच्या या तीव्र झळा सहन करताना जिल्ह्यातील ग्रामीण भागातील नागरिकांना पिण्याच्या पाण्यासाठी मोठा संघर्ष करावा लागत आहे. दिवसेंदिवस परिस्थिती अधिक बिकट होत चालली असून पावसाळा सुरू होईपर्यंत हे संकट अधिक गडद होण्याची शक्यता आहे. प्रशासनाने टँकरद्वारे पाणीपुरवठ्याची व्यवस्था केली असली तरी वाड्यावस्त्यांपर्यंत पुरेसे पाणी पोहोचवणे हे एक मोठे आव्हान बनले आहे. पाण्याची ही दाहकता कमी होण्यासाठी जिल्हावासीय मान्सूनच्या आगमनाची आतुरतेने प्रतीक्षा करत आहेत.