स्वतंत्र बातमी

गेल्या आठवडाभरापासून कडाक्याच्या उन्हाचा सामना करणाऱ्या महाराष्ट्रातील जनतेसाठी हवामान विभागाने एक महत्त्वाची चिंताजनक बातमी दिली आहे. विदर्भासह मराठवाडा आणि मध्य महाराष्ट्रात पुढील पाच दिवस अवकाळी पाऊस आणि गारपिटीची शक्यता वर्तवण्यात आली आहे. विशेषतः अठरा ते वीस मार्च दरम्यान पावसाचा जोर अधिक राहण्याचा अंदाज आहे.

हवामान खात्याने दिलेल्या माहितीनुसार, गुजरात आणि लगतच्या महाराष्ट्रावर वाऱ्याची प्रतिचक्रीय स्थिती निर्माण झाली आहे. तसेच विदर्भापासून दक्षिण मध्य महाराष्ट्रापर्यंत वाऱ्याची द्रोणीय स्थिती तयार झाली आहे. यामुळे बंगालचा उपसागर आणि अरबी समुद्रावरून बाष्पयुक्त वारे राज्याकडे येत आहेत. या संमिश्र हवामान स्थितीमुळे राज्यात ढगाळ वातावरण निर्माण होऊन तीस ते चाळीस किमी वेगाने वारे वाहतील आणि मेघगर्जनेसह पाऊस पडेल. हवामान विभागाने राज्यातील वीस जिल्ह्यांसाठी पावसाचा इशारा दिला आहे. यामध्ये मुख्यत्वे अमरावती, अकोला, वर्धा, बुलढाणा, वाशिम, नागपूर, भंडारा, गोंदिया, यवतमाळ, नांदेड, परभणी, हिंगोली, जालना, बीड, धाराशिव, लातूर, अहिल्यानगर, सातारा, सांगली आणि सोलापूर या जिल्ह्यांचा समावेश आहे. उद्या विदर्भातील अमरावती, अकोला, वर्धा, नागपूर, भंडारा आणि गोंदियामध्ये तुरळक ठिकाणी गारपिटीची शक्यता अधिक आहे. दुपारनंतर उष्णता वाढल्यामुळे विजांच्या कडकडाटासह गारा पडू शकतात.

सध्या रब्बी हंगामातील पिकांची काढणी अंतिम टप्प्यात आहे. गहू, हरभरा आणि फळपिकांचे या पावसामुळे मोठे नुकसान होण्याची भीती आहे. कृषी विभागाने शेतकऱ्यांना काढणी केलेले धान्य सुरक्षित ठिकाणी साठवण्याचे आणि उघड्यावर असलेले पीक ताडपत्रीने झाकून घेण्याचे आवाहन केले आहे. या पावसामुळे तापमानात सरासरी दोन ते चार अंशांची घट होऊन उन्हाच्या झळांपासून काहीसा दिलासा मिळेल. मात्र, मुंबईसह ठाणे, पालघर आणि रायगड या उत्तर कोकण पट्ट्यात पावसाची शक्यता कमी असली, तरी तिथे आर्द्रतेमुळे रात्रीचा उकाडा वाढणार आहे.