स्वतंत्र बातमी

गेल्या अनेक महिन्यांपासून रखडलेल्या मेट्रो मार्गिका नऊ आणि मेट्रो दोन-ब मधील पहिल्या टप्प्यांचे लोकार्पण अखेर संपन्न होत आहे. मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्या हस्ते या नव्या मार्गिकांचे उद्घाटन करण्यात आले. यामुळे मिरा-भाईंदरकरांचा अंधेरीपर्यंतचा प्रवास आणि पूर्व उपनगरातील चेंबूर ते मानखुर्द प्रवास अधिक जलद आणि सुखकर होणार आहे. मेट्रो मार्गिका नऊ ही दहिसर पूर्व ते मिरा-भाईंदर या दरम्यान धावणार आहे. यातील पाच किमीचा पहिला टप्पा आता प्रवाशांसाठी खुला झाला आहे. दहिसर पूर्व, पांडुरंग वाडी, मिरा गाव आणि काशीगाव असा या मेट्रोचा प्रवास असेल. या मार्गिकेमुळे मिरा-भाईंदरकरांना आता थेट मेट्रो सात दहिसर ते गुंदवली ही जोडली गेली आहे. म्हणजेच, काशीगाववरून बसलेल्या प्रवाशाला कोणत्याही अडथळ्याशिवाय थेट अंधेरी गाठता येईल. दहिसर चेकनाका येथील भीषण वाहतूक कोंडीचा सामना करणाऱ्या प्रवाशांसाठी हा एक मोठा दिलासा ठरणार आहे.

मुंबईच्या पूर्व उपनगरासाठी मेट्रो दोन-ब ही एक महत्त्वाची जीवनवाहिनी ठरणार आहे. या मार्गिकेतील पाच पूर्णांक त्रेपन्न किमी लांबीचा टप्पा एक कार्यान्वित झाला आहे. डायमंड गार्डन, शिवाजी चौक, बीएसएनएल मेट्रो, मानखुर्द आणि मंडाले असा ही मेट्रो प्रवास करेल.  मानखुर्द आणि चेंबूर परिसरात राहणाऱ्या नागरिकांना आता वातानुकूलित प्रवासाचा पर्याय उपलब्ध झाला आहे. हार्बर रेल्वे मार्गावरील गर्दीचा ताण कमी करण्यासाठी ही मार्गिका भविष्यात मोलाची भूमिका बजावेल. मुंबई महानगर प्रदेश विकास प्राधिकरणाने दोन्ही मार्गिकांसाठी सुटसुटीत वेळापत्रक जाहीर केले आहे. आठ एप्रिलपासून व्यावसायिक तत्त्वावर या फेऱ्या सर्वसामान्यांसाठी सुरू होतील. मेट्रो मार्ग नऊ आणि सातचे एकत्रीकरण झाल्यामुळे, आता गुंदवली ते काशीगाव असा प्रवास थेट करता येणार आहे. मात्र, दहिसर ते अंधेरी पश्चिम आणि मेट्रो सात आता स्वतंत्र मार्गिका म्हणून चालवल्या जाणार आहेत.

एमएमआरडीएचे आयुक्त डॉ. संजय मुखर्जी यांनी सांगितले की, या दोन नव्या मार्गिकांमुळे मुंबईच्या मेट्रो जाळ्याचा विस्तार झाला असून, यामुळे रस्ते वाहतुकीवरील ताण कमी होईल. ‘मुंबई इन मिनिट्स’ हे स्वप्न पूर्ण करण्याच्या दिशेने हे एक महत्त्वाचे पाऊल आहे. पुढील काही वर्षात या दोन्ही मार्गिकांचे संपूर्ण टप्पे पूर्ण झाल्यावर प्रवाशांना वांद्रे-कुर्ला संकुल आणि विमानतळापर्यंतचा प्रवास करणे अधिक सोपे होईल.