स्वतंत्र बातमी

वाढत्या उन्हामुळे बाष्पीभवन वेगाने होत असल्याने पिंपरी-चिंचवड शहराची तहान भागविणाऱ्या मावळमधील पवना धरणातील पाणीसाठा झपाट्याने कमी होत आहे. ताज्या आकडेवारीनुसार, धरणात आता केवळ एकोणचाळीस टक्के पाणीसाठा शिल्लक राहिला आहे. हा साठा जून महिन्यापर्यंत म्हणजे पावसाळा सुरू होईपर्यंत शहराला पुरेल इतका असल्याचे महापालिकेच्या पाणीपुरवठा विभागाने स्पष्ट केले असले, तरी नागरिकांना पाण्याचा काटकसरीने वापर करण्याचे आवाहन करण्यात आले आहे.

पवना धरणातून पिंपरी-चिंचवड शहर, एमआयडीसी, तळेगाव दाभाडे आणि देहूरोड यांसारख्या नगरपालिका तसेच काही ग्रामपंचायतींना पाणीपुरवठा केला जातो. एप्रिल महिन्याच्या सुरुवातीला हा साठा सेहेचाळीस टक्क्यांच्या आसपास होता, मात्र गेल्या वील ते पंचवीस दिवसांत तीव्र उष्णतेमुळे त्यात घट झाली आहे. सध्या शहराला गेल्या साडेसहा वर्षांपासून दोन दिवसातून एकदा पाणीपुरवठा केला जात आहे. तरीही, उन्हाळ्याच्या तीव्रतेमुळे पाण्याची मागणी वाढली असून पाणीपुरवठ्यावर ताण येत आहे. फक्त पवनाच नव्हे, तर परिसरातील इतर धरणांची स्थितीही चिंतेची आहे. आंद्रा धरणात सध्या सेहेचाळीस टक्के पाणीसाठा शिल्लक आहे. येथून दररोज नव्वद एमएलडी पाणी उचलले जाते, मात्र हे पाणी अधिक दूषित असल्याच्या तक्रारी नागरिकांकडून येत आहेत, ज्यामुळे शुद्धीकरणाचा खर्च वाढत आहे. भामा आसखेड धरणात बावन्न टक्के साठा आहे, मात्र या योजनेचे काम पूर्ण न झाल्याने शहराला अजूनही एकशे सदुसष्ट एमएलडी पाण्यापासून वंचित राहावे लागत आहे. मुळशी धरणात छत्तीस टक्के साठा असून त्याचे पाणी मुळा नदीत सोडले जाते.

शहरात अनेक भागांत कमी दाबाने किंवा गढूळ पाणी येत असल्याच्या तक्रारींमध्ये वाढ झाली आहे. उन्हाळ्यामुळे बाष्पीभवन वाढल्याने धरणातील पातळी खाली गेली असून, वितरणादरम्यान तांत्रिक अडचणी येत आहेत. पाणीपुरवठा विभागाचे सहशहर अभियंता अजय सूर्यवंशी यांनी स्पष्ट केले आहे की, उपलब्ध साठा जूनपर्यंत पुरणारा असला तरी, पाऊस लांबल्यास परिस्थिती गंभीर होऊ शकते. त्यामुळे आत्तापासूनच नियोजन करणे आवश्यक आहे.

पाणीसंकट टाळण्यासाठी पिंपरी-चिंचवड महापालिकेने नागरिकांना काही महत्त्वाच्या सूचना केल्या आहेत. पिण्याच्या पाण्याचा वापर आंगण, रस्ते किंवा जिने धुण्यासाठी करू नये. दुचाकी किंवा चारचाकी वाहने धुण्यासाठी पिण्याच्या पाण्याचा वापर टाळावा. नळांना तोट्या बसवून घ्याव्यात आणि पाण्याची गळती असल्यास ती तातडीने दुरुस्त करावी, अशा सूचना केल्या आहेत.  पिंपरी-चिंचवड शहराची लोकसंख्या वेगाने वाढत असून केवळ पवना धरणावर अवलंबून राहणे आता कठीण होत आहे. भामा आसखेड आणि आंद्रा धरणातून अतिरिक्त पाणी मिळवण्याच्या योजना पूर्ण होणे गरजेचे आहे. जर मे महिन्यात उष्णतेची लाट अशीच कायम राहिली, तर बाष्पीभवनाचा वेग अजून वाढेल आणि धरणाची पातळी झपाट्याने खाली जाईल.