मुंबई महानगरपालिकेने यंदाच्या पावसाळ्यासाठी कंबर कसली आहे. शहराच्या सखल भागात साचणाऱ्या पाण्याचा उपसा करण्यासाठी प्रशासनाने यंदा तब्बल पाचशे सत्तेचाळीस पंप बसवण्याचा निर्णय घेतला आहे. गेल्या वर्षीच्या तुलनेत यंदा पंपांच्या संख्येत मोठी वाढ केली आहे. यासाठी महापालिकेने सुमारे एकशे बेचाळीस कोटी रुपयांच्या निविदाही प्रसिद्ध केल्या आहेत.
मुंबईत मुसळधार पावसात सखल भागात पाणी साचणे ही नेहमीची बाब झाली आहे. गेल्या वर्षी पालिकेने चारशे बावीस ठिकाणी पंप बसवले होते. मात्र, मे २०२५ मध्ये झालेल्या अवकाळी पावसामुळे पाणी साचून राहते, असे नवीन परिसर समोर आले होते. त्यामुळे प्रत्यक्षात पाचशे चौदा ठिकाणी पंप लावावे लागले होते. या अनुभवातून धडा घेत यंदा पालिकेने आधीच पाचशे सत्तेचाळीस पंपांची मागणी केली आहे. विशेष म्हणजे, शहरात ठिकठिकाणी पर्जन्य जल वाहिन्यांची कामे सुरू असतानाही पंपांची संख्या वाढत असल्याने आश्चर्य व्यक्त होत आहे. मुंबई शहर विभागात एकशे शेहेचाळीस पंप लावण्यात आलेले असून पश्चिम उपनगरांत दोनशे तेवीस पंप लावण्यात आलेले आहेत. याशिवाय महापालिकेकडे स्वतःचे सहव्वीस अतिउच्च क्षमतेचे फिरते पंप संचही उपलब्ध असणार आहेत. हे सर्व पंप पंचवीस मे ते १५ ऑक्टोबर २०२६ या कालावधीत अहोरात्र कार्यरत राहतील. सध्या मिठी नदी आणि मोठ्या नाल्यांच्या सफाईसाठी कंत्राटदार पुढे येत नसल्याने नालेसफाईच्या कामांना उशीर होत आहे, ही चिंतेची बाब ठरत आहे.
मुंबईतील पर्जन्य जल वाहिन्या अनेक ठिकाणी समुद्राच्या भरती-ओहोटीवर अवलंबून असतात. जेव्हा समुद्रात भरती असते, तेव्हा पावसाचे पाणी नैसर्गिकरित्या वाहून जात नाही. अशा वेळी हे पाचशे सत्तेचाळीस पंप महत्त्वाची भूमिका बजावतात. हे पंप भाडेतत्त्वावर घेतले जात असून, त्यांच्या देखभाल आणि संचालनाची जबाबदारी संबंधित कंत्राटदाराची असेल. जर पावसाळ्यात पाणी साचण्याचे एखादे नवीन ठिकाण आढळले, तर पंपांची संख्या ऐनवेळी वाढवण्याची तरतूदही प्रशासनाने केली आहे.