स्वतंत्र बातमी

महाराष्ट्र राज्य मार्ग परिवहन महामंडळाने प्रवाशांची गैरसोय टाळण्यासाठी चौऱ्याहत्तर जादा बसगाड्या सोडण्याचा महत्त्वपूर्ण निर्णय घेतला आहे. दरवर्षी उन्हाळ्यात खाजगी ट्रॅव्हल्सकडून होणारी प्रवाशांची लूट थांबवण्यासाठी आणि सुरक्षित प्रवासाचा पर्याय देण्यासाठी एसटी प्रशासनाने हे पाऊल उचलले आहे. एप्रिल आणि मे महिन्यांत शाळा-महाविद्यालयांना सुटी असते. तसेच याच काळात लग्नाचे मुहूर्त मोठ्या प्रमाणावर असल्याने प्रवाशांचा ओघ वाढतो. रेल्वेचे आरक्षण महिनाभर आधीच फुल्ल झाल्यामुळे अनेक प्रवाशांना एसटीचाच आधार असतो. प्रवाशांना बससाठी ताटकळत उभे राहावे लागू नये आणि त्यांना वेळेत इच्छित स्थळी पोहोचता यावे, हा या चौऱ्याहत्तर जादा गाड्या सुरू करण्यामागचा मुख्य उद्देश आहे.

पुणे हे राज्याचे मध्यवर्ती केंद्र असल्याने येथून सर्व दिशांना प्रवासी वाहतूक होत असते. प्रामुख्याने लातूर, धाराशिव, संभाजीनगर, बीड आणि नागपूर या भागांत जाणाऱ्या प्रवाशांची संख्या मोठी आहे. सुटीमध्ये कोकणात जाणाऱ्यांसाठी चिपळूण, रत्नागिरी आणि महाड या मार्गांवर जादा फेऱ्यांचे नियोजन करण्यात आले आहे. जळगाव, धुळे आणि नाशिक या शहरांसाठीही स्वारगेट आणि शिवाजीनगर – वाकडेवाडी स्थानकांवरून विशेष गाड्या सोडल्या जातील.

राज्य सरकारने महिलांना आणि ज्येष्ठ नागरिकांसाठी जाहीर केलेल्या सवलतींमुळे एसटीच्या प्रवासी संख्येत वाढ झाली आहे. उन्हाळी सुटीत कुटुंबियांसह प्रवास करणाऱ्या महिला आणि ज्येष्ठांची संख्या अधिक असल्याने चौऱ्याहत्तर जादा गाड्यांचे हे नियोजन अत्यंत फायदेशीर ठरणार आहे. पुण्यातील प्रमुख तीन स्थानकांवरून या जादा गाड्यांचे संचलन केले जाणार आहे. स्वारगेट स्थानकामधून प्रामुख्याने कोल्हापूर, सोलापूर आणि पश्चिम महाराष्ट्रातील शहरांसाठी गाड्या सुटतील. २शिवाजीनगर स्थानकातून मराठवाडा आणि खानदेश कडे जाणाऱ्या प्रवाशांची सोय केली जाईल. पुणे स्टेशन स्थानकामधून लांब पल्ल्याच्या आणि आंतरराज्य मार्गावरील काही जादा फेऱ्यांचे नियोजन आहे. उन्हाळ्याच्या दिवसात खाजगी बस चालक अव्वाच्या सव्वा भाडे आकारून प्रवाशांची आर्थिक पिळवणूक करतात. एसटीने चौऱ्याहत्तर जादा गाड्या उतरवल्यामुळे प्रवाशांना स्वस्त दरात प्रवासाचा पर्याय उपलब्ध झाला आहे. जादा गाड्या चालवण्यासाठी पुणे विभागाने चालक आणि वाहकांच्या सुट्यांचे योग्य नियोजन केले आहे. गाड्यांच्या देखभालीसाठी कार्यशाळांना सूचना देण्यात आल्या असून, प्रवासादरम्यान गाड्या नादुरुस्त होणार नाहीत याची काळजी घेतली जात आहे. तसेच मुख्य बस स्थानकांवर प्रवाशांच्या मदतीसाठी मदत विभाग आणि जादा कर्मचारी तैनात करण्यात आले आहेत.