मार्वलच्या चाहत्यांसाठी एक अत्यंत आनंदाची आणि उत्सुकतेची बातमी समोर आली आहे. बहुप्रतीक्षित इंग्रजी लाईव्ह-अॅक्शन वेब सिरीज ‘स्पायडर-नॉयर’ प्रेक्षकांच्या भेटीस आली आहे. या सिरीजचा जागतिक प्रीमियर २७ मे २०२६ रोजी ‘प्राइम व्हिडिओ’ या ओटीटी प्लॅटफॉर्मवर करण्यात आला आहे, जिथे त्याचे सर्व भाग एकाच वेळी पाहण्यासाठी उपलब्ध आहेत. तर अमेरिकेतील प्रेक्षकांसाठी ही सिरीज दोन दिवस आधी, म्हणजेच २५ मे रोजी ‘एमजीएम प्लस’वर रिलीज करण्यात आली होती. पहिल्या सीझनमध्ये एकूण ८ भागांचा समावेश असून, ही सिरीज प्रेक्षकांना एका आगळ्यावेगळ्या आणि रहस्यमय जगात घेऊन जाते
या वेब सिरीजची कथा १९३० च्या दशकातील न्यूयॉर्क शहरावर आधारित आहे. कथेची पार्श्वभूमी अत्यंत गडद, गंभीर आणि गुन्हेगारी विश्वाभोवती फिरणारी आहे. यात हॉलीवूडचे दिग्गज अभिनेते निकोलस केज मुख्य भूमिकेत असून त्यांनी ‘बेन रायली’ म्हणजेच ‘द स्पायडर’ हे पात्र साकारले आहे. बेन रायली हा एक नशीब खचलेला, आयुष्यात संघर्ष करणारा खाजगी गुप्तहेर आहे. तो पूर्वी एक सुपरहिरो असतो, परंतु बदलत्या परिस्थितीमुळे तो या सगळ्यापासून दूर गेलेला असतो. मात्र, शहरातील वाढती गुन्हेगारी, माफिया राज, भ्रष्टाचार आणि काही भयानक अमानवी संकटांचा सामना करण्यासाठी त्याला पुन्हा एकदा मुखवटा परिधान करून सुपरहिरोच्या रूपात मैदानात उतरावे लागते.
या सिरीजचे सर्वात मोठे वैशिष्ट्य म्हणजे प्रेक्षकांना मिळणारा अनोखा व्हिज्युअल अनुभव. ही सिरीज प्रेक्षकांसाठी दोन वेगवेगळ्या पर्यायांमध्ये उपलब्ध करून देण्यात आली आहे. प्रेक्षक ही संपूर्ण सिरीज १९३० च्या दशकाचा अस्सल फिल देणाऱ्या ब्लॅक अँड व्हाईट (कृष्णधवल) स्वरूपात पाहू शकतात किंवा संपूर्ण रंगीत स्वरूपातही याचा आनंद घेऊ शकतात. सिरीजचे दिग्दर्शन हॅरी ब्रॅडबीर आणि एनझिंगा स्टुअर्ट यांसारख्या नावाजलेल्या दिग्दर्शकांनी केले आहे. त्यांनी या सिरीजमध्ये त्या काळातील वातावरण, वेशभूषा आणि रहस्य अतिशय हुबेहूब पद्धतीने पडद्यावर मांडले आहे.
थोडक्यात सांगायचे तर, ‘स्पायडर-नॉयर’ ही केवळ एक पारंपारिक सुपरहिरो कथा नसून, ती एक उत्तम क्राईम-थ्रिलर आणि सस्पेन्स सिरीज आहे. मार्वल कॉमिक्सच्या चाहत्यांसह ज्यांना सस्पेन्स आणि जुन्या काळातील रहस्यमयी कथा पाहायला आवडतात, अशा सर्वच प्रेक्षकांसाठी ही सिरीज एक पर्वणी ठरत आहे. जर तुम्हाला एक वेगळी, क्रिस्पी आणि अंगावर काटा आणणारी इंग्रजी सिरीज पाहायची असेल, तर प्राइम व्हिडिओवरील ही सिरीज नक्कीच पाहण्यासारखी आहे.