स्वतंत्र बातमी

गेल्या पाच वर्षांत कोथरूडमधील घरांच्या किमतीत सातत्यपूर्ण वाढ झाली आहे. २०२१ मध्ये सरासरी प्रति चौरस फूट दर १० हजार ४५० रुपये होता. तो दर २०२५ च्या अखेरीस १३ हजार ६५० रुपयांवर पोहोचला आहे.

पानशेतच्या पुरानंतर वसलेले कोथरूड नव्वदच्या दशकात बंगले आणि मोकळ्या जागांचे उपनगर म्हणून ओळखले जात होते. आज हे परिसर जागतिक दर्जाच्या नागरी सोयी-सुविधांनी समृद्ध झाले आहे. हिंजवडी, बाणेर आणि मुंबई-बंगळुरू महामार्गाशी थेट जोडणी हे कोथरूडचे मुख्य वैशिष्ट्य आहे. पुण्यात सर्वप्रथम वनाज ते रामवाडी मेट्रो मार्गिकेची सुरुवात याच भागातून झाली. वनाज, आनंदनगर, पौड फाटा आणि नळ स्टॉप ही चार स्थानके कोथरूडला थेट जोडतात. वनाज ते चांदणी चौक विस्ताराची कामे सुरू आहेत. नळ स्टॉप ते माणिकबाग मार्ग प्रस्तावित आहे. मेट्रो स्थानकांपर्यंत चालत जाण्याची सोय असल्याने या परिसरातील घरांना खरेदीदारांकडून पसंती दिली जात आहे.