स्वतंत्र बातमी

पुरंदर तालुक्यातील वनपुरी, कुंभारवळण, एखतपूर, उदाचीवाडी, पारगाव, खानवडी आणि मुंजवडी या सात गावांमध्ये छत्रपती संभाजीराजे आंतरराष्ट्रीय विमानतळ प्रस्तावित आहे. सुरुवातीच्या काळात स्थानिक पातळीवर जमिनीच्या दरावरून तीव्र विरोध झाला. राज्य शासनाने प्रति एकर १ कोटी ६१ लाख रुपयांचा भरघोस मोबदला आणि दहा टक्के विकसित भूखंडाची योजना जाहीर केली. त्यानंतर बहुतांश शेतकऱ्यांनी स्वेच्छेने संमतीपत्रे दिली. जमिनींवरील जुने कौटुंबिक वाद, मोजणीतील त्रुटी आणि न्यायालयातील दाव्यांमुळे काही क्षेत्राचा पेच कायम राहिला. ७ मे पासून सुरू झालेल्या प्रक्रियेला ३० जून आणि ३१ जुलै अशी मुदतवाढ देण्यात आली होती. आता दिलेली १६ ऑगस्ट ही अंतिम मुदत मानली जात असून, त्यानंतर प्रत्यक्ष विमानतळ बांधकामाच्या दिशेने पुढील पावले उचलली जातील.