स्वतंत्र बातमी

ठाणे शहराच्या विकासासाठी पायाभूत सुविधांचा विस्तार होणे अत्यंत गरजेचे आहे. वर्तुळाकार मेट्रो आणि रस्ते रुंदीकरणामुळे शहराची वाहतूक कोंडीतून सुटका होईल यात शंका नाही. परंतु, या विकासाची किंमत तब्बल ३,७४९ झाडांच्या बळीने मोजावी लागत आहे. प्रशासनाने २,८९९ झाडांच्या पुनर्रोपणाचा दावा केला असला तरी यापूर्वीचा पुनर्रोपणाचा यशोदर फारसा उत्साहवर्धक राहिलेला नाही. ५० ते ८५ वर्षे जुनी झाडे तोडल्यानंतर केवळ नवीन रोपे लावून ते नुकसान भरून निघत नाही. त्यामुळे प्रशासनाने तोडलेल्या झाडांच्या बदल्यात लावल्या जाणाऱ्या नवीन वृक्षांचे संवर्धन आणि पुनर्रोपित झाडांचे जगणे निश्चित करण्यासाठी कडक धोरण राबवले पाहिजे. विकास करताना पर्यावरणाचा बळी जाणार नाही याची दक्षता घेणे हीच काळाची गरज आहे.