अनेक राज्यांना पूराचा इशारा

ऑगस्ट महिन्याच्या सुरुवातीला देशातील काही भागांत पावसाने विश्रांती घेतली होती. १ जून ते १० ऑगस्टदरम्यान देशभरात १२ टक्के पावसाची तूट निर्माण झाली होती. ५३५.६ मिमी सरासरीच्या तुलनेत केवळ ४७२.६ मिमी पावसाची नोंद झाली होती. ऑगस्टच्या दुसऱ्या आठवड्यात अरबी समुद्र आणि बंगालच्या उपसागरातून येणाऱ्या बाष्पयुक्त वाऱ्यांमुळे मॉन्सून पुन्हा सक्रिय झाला आहे. मध्य प्रदेशावरील चक्रीय स्थिती आणि बंगालच्या उपसागरात तयार होणारे कमी दाबाचे क्षेत्र या दोन्ही घटकांमुळे उत्तर-पश्चिम, पूर्व आणि ईशान्य भारतात पावसाचा जोर वाढला आहे. डोंगराळ भागात ढगफुटी आणि भूस्खलनाचा धोका निर्माण झाला आहे. पुढील आठवड्यात पाऊस संपूर्ण भारतभर पसरण्याची शक्यता हवामान खात्याने व्यक्त केली आहे.