स्वतंत्र बातमी

शीव येथील प्रतीक्षा नगर भागातील म्हाडाच्या संक्रमण शिबिर इमारती अनेक दशकांपासून अत्यंत जर्जर आणि धोकादायक अवस्थेत उभ्या आहेत. उपकरप्राप्त इमारतींमधील रहिवाशांना तात्पुरत्या निवासासाठी येथे स्थलांतरित करण्यात आले होते. कालानुरूप या इमारतींची पडझड झाल्याने अपघातांचा धोका वाढला होता. खासगी विकासकांऐवजी म्हाडाने स्वतःच हा समूह पुनर्विकास हाती घ्यावा, अशी जोरदार मागणी स्थानिक लोकप्रतिनिधी आणि रहिवाशांनी लावून धरली होती. या पार्श्वभूमीवर म्हाडा प्रशासनाने तांत्रिक पाहणी करून संपूर्ण क्षेत्राचा क्लस्टर पद्धतीने पुनर्विकास करण्याचा निर्णय घेतला. राज्य सरकारची प्रशासकीय आणि वित्तीय मान्यता मिळाल्यानंतर पुढील काही महिन्यांत निविदा प्रक्रिया पूर्ण करून प्रत्यक्ष बांधकामाला सुरुवात करण्याचे नियोजन म्हाडाने आखले आहे.