काँग्रेस पक्षाने आगामी राज्यसभेच्या निवडणुकीसाठी सहा राज्यांमधील नऊ जागांसाठी उमेदवारांची नावे जाहीर केली आहेत. येत्या सोळा मार्च रोजी राज्यसभेची द्विवार्षिक निवडणूक होणार आहे. यासाठी काँग्रेस पक्षाने गुरुवारी आपल्या सहा उमेदवारांची अधिकृत यादी प्रसिद्ध केली आहे. दुसरीकडे, भारतीय जनता पक्षानेही विविध राज्यांतून आपल्या उमेदवारांच्या नावांवर शिक्कामोर्तब केले आहे. या निवडींमध्ये अनुभवी कायदेतज्ज्ञ, पक्षाचे निष्ठावान कार्यकर्ते आणि सामाजिक समतोल साधणाऱ्या नेत्यांना संधी देण्यात आली आहे.
काँग्रेस पक्षाचे अध्यक्ष मल्लिकार्जुन खर्गे यांनी मान्यता दिलेल्या यादीत प्रामुख्याने तेलंगणा आणि इतर राज्यांतील नेत्यांचा समावेश आहे. काँग्रेसचे ज्येष्ठ नेते आणि प्रसिद्ध वकील सिंघवी यांना पुन्हा एकदा संधी देण्यात आली आहे. मुख्यमंत्री रेवंत रेड्डी यांचे निकटवर्तीय म्हणून ओळखले जाणारे वेम नरेंदर रेड्डी यांना तेलंगणातून उमेदवारी मिळाली आहे. छत्तीसगडच्या कोट्यातून पक्षाने पुन्हा एकदा आदिवासी नेत्या फुलो देवी नेताम यांच्यावर विश्वास दाखवला आहे. हरियाणातील दलित समाजाचे प्रतिनिधित्व म्हणून कर्मवीर सिंग बौद्ध यांना संधी देण्यात आली आहे. हिमाचलमधून अनुराग शर्मा यांचे नाव निश्चित करण्यात आले आहे. तमिळनाडूच्या कोट्यातून एम. ख्रिस्तोफर टिळक यांना राज्यसभेचे तिकीट मिळाले आहे.
भाजपनेही आपल्या पहिल्या यादीत अनेक दिग्गजांना स्थान दिले असून, विशेषतः महाराष्ट्रातील नावांनी सर्वांचे लक्ष वेधले आहे. भाजपचे राष्ट्रीय सरचिटणीस विनोद तावडे तब्बल सात वर्षांनंतर केंद्रीय राजकारणात पुनरागमन करत आहेत. केंद्रीय राज्यमंत्री आणि रिपाईचे नेते रामदास आठवले यांना एनडीएचा मित्रपक्ष म्हणून पुन्हा राज्यसभेवर पाठवण्यात येणार आहे. नागपूरच्या माजी महापौर माया इवनाते यांना संधी देऊन भाजपने महिला आणि आदिवासी प्रतिनिधित्व वाढवले आहे. धनगर समाजाचे नेते रामराव वडकुते यांनाही उमेदवारी देऊन सामाजिक समीकरण साधले आहे. भाजपचे राष्ट्रीय अध्यक्ष नितीन नबीन हे बिहारमधून राज्यसभेवर उमेदवारी दिली गेली आहे. माजी लोकसभा खासदार संजय भाटिया यांना हरियाणातून संधी मिळाली आहे. दहा राज्यांतील सदतीस जागांसाठी ही निवडणूक पार पडत आहे. ५ मार्च ही उमेदवारी अर्ज भरण्याची शेवटची तारीख होती. उद्या, सहा मार्च रोजी अर्जांची छाननी होईल, तर नऊ मार्चपर्यंत अर्ज मागे घेता येतील. सोळा मार्च रोजी सकाळी नऊ ते दुपारी चार या वेळेत मतदान होईल आणि त्याच दिवशी सायंकाळी पाच वाजता निकाल जाहीर केला जाईल.