रायगडमध्ये पावसाचा हाहाकार

कोकणात मान्सूनचा जोर नेहमीच जास्त असतो, ही वस्तुस्थिती असतानाही कोट्यवधी रुपये खर्च करून उभारण्यात येणारे प्रकल्प पहिल्याच पावसात कसे खचतात, हा खरा संशोधनाचा विषय आहे. काळ नदीवर अवघ्या पंधरा दिवसांपूर्वी सुरू झालेल्या पुलाचा भराव वाहून जाणे हे निव्वळ कंत्राटदाराचे अपयश नसून शासकीय देखरेखीतील ढिसाळपणा स्पष्ट करते. दरडी कोसळणे ही नैसर्गिक आपत्ती असू शकते, मात्र नवनिर्मित रस्ते खचणे हा पूर्णपणे मानवनिर्मित निष्काळजीपणा आहे. प्रशासनाने केवळ मलमपट्टी न करता कंत्राटदारांवर कठोर कायदेशीर कारवाई करणे गरजेचे आहे, अन्यथा दर पावसाळ्यात जनतेचा प्रवास असाच जीवघेणा ठरेल.