आखाती देशांमधील युद्धजन्य परिस्थितीमुळे निर्माण झालेल्या पुरवठा साखळीतील अडथळ्यांमुळे कुडाळ औद्योगिक वसाहतीमधील सुमारे तीस उद्योगांचे उत्पादन पूर्णपणे ठप्प झाले आहे. व्यावसायिक गॅस सिलेंडरचा पुरवठा अचानक आणि कोणतीही पूर्वसूचना न देता बंद झाल्याने येथील उद्योजक आणि कामगार वर्गात चिंतेचे वातावरण पसरले आहे.
कुडाळ एमआयडीसीमधील अनेक लघु आणि मध्यम उद्योग त्यांच्या उत्पादन प्रक्रियेसाठी पूर्णपणे गॅसवर अवलंबून आहेत. विशेषतः उष्णता प्रक्रिया आणि पावडर कोटिंगसारख्या कामांसाठी गॅसची नितांत गरज असते. मात्र, गेल्या काही दिवसांपासून व्यावसायिक गॅसचा पुरवठा खंडित झाला आहे. गॅस वितरकांनी पुरवठा बंद करण्यापूर्वी उद्योजकांना कोणतीही माहिती दिली नाही. उत्पादन थांबल्यामुळे दिवसाला लाखो रुपयांचे नुकसान होत आहे. येथील अनेक कंपन्यांचे परदेशी ग्राहकांशी करार आहेत. वेळेत उत्पादन न मिळाल्यास या कंपन्यांना मोठ्या दंडात्मक कारवाईला सामोरे जावे लागू शकते.
इस्रायल-इराण तणाव आणि आखाती देशांमधील अशांततेमुळे कच्च्या तेलाच्या आणि गॅसच्या आयातीवर परिणाम झाला आहे. होर्मुजच्या सामुद्रधुनीतील तणावामुळे जहाजांचे मार्ग बदलले असून, त्याचा थेट परिणाम स्थानिक बाजारपेठेतील गॅस उपलब्धतेवर झाला आहे. यामुळे केवळ कुडाळच नव्हे, तर राज्यातील इतर एमआयडीसी क्षेत्रांतही इंधनाचे दर वाढण्याची आणि तुटवडा निर्माण होण्याची भीती व्यक्त केली जात आहे.
उत्पादन ठप्प झाल्यामुळे सर्वात मोठा फटका कामगार वर्गाला बसला आहे. या तीस उद्योगांमध्ये प्रत्यक्ष आणि अप्रत्यक्षपणे शेकडो कामगार काम करत आहेत. गॅस पुरवठा लवकर पूर्ववत झाला नाही, तर कारखानदारांना कामगार कपात करण्याशिवाय पर्याय उरणार नाही. यामुळे स्थानिक अर्थव्यवस्था कोलमडू शकते. कुडाळ एमआयडीसी इंडस्ट्रीज असोसिएशनचे अध्यक्ष मोहन होडावडेकर यांनी या गंभीर परिस्थितीची दखल घेत सिंधुदुर्ग जिल्हाधिकाऱ्यांना तातडीने निवेदन सादर केले आहे. शासनाने आणि प्रशासनाने या प्रकरणात तातडीने हस्तक्षेप करावा. गॅस पुरवठा पूर्ववत न झाल्यास येथील उद्योग कायमचे बंद पडण्याची भीती आहे. आम्ही यासंदर्भात पालकमंत्री नितेश राणे आणि उद्योगमंत्री उदय सामंत यांच्याकडेही धाव घेतली आहे, असे होडावडेकर यांनी स्पष्ट केले. उद्योजकांनी मागणी केली आहे की, सरकारने आपत्कालीन साठ्यातून उद्योगांसाठी गॅसची उपलब्धता करून द्यावी. तसेच, वारंवार निर्माण होणाऱ्या या इंधन टंचाईवर कायमस्वरूपी तोडगा काढण्यासाठी एमआयडीसीमध्ये नैसर्गिक गॅस पाइपलाइनची सोय लवकरात लवकर करावी. सध्या कुडाळ एमआयडीसीमधील कारखान्यांची धुराडी शांत असून, गॅसच्या प्रतीक्षेत येथील यंत्रे थांबलेली आहेत. आता राज्य सरकार आणि जिल्हा प्रशासन यावर काय उपाययोजना करते, याकडे सर्वांचे लक्ष लागले आहे.