ब्रम्होसने सुसज्ज जहाज नौदलात दाखल

‘प्रोजेक्ट-सतरा ए’ अंतर्गत बांधण्यात आलेली आयएनएस दूनागिरी ही पाचवी स्टेल्थ फ्रिगेट आहे. शत्रूच्या रडार यंत्रणेला चकवा देण्यात सक्षम असलेल्या या युद्धनौकेवर जगातील सर्वात वेगवान सुपरसोनिक क्रूझ क्षेपणास्त्र — ब्रह्मोस — तैनात करण्यात आले आहे. हे क्षेपणास्त्र हवेतून तसेच समुद्राच्या पृष्ठभागावरून शत्रूवर अचूक मारा करण्यास सक्षम आहे.

हवाई सुरक्षेसाठी बराक-८ मध्यम पल्ल्याच्या क्षेपणास्त्र यंत्रणेचा वापर करण्यात आला आहे. यामुळे शत्रूची विमाने आणि येणारी क्षेपणास्त्रे हवेतच निकामी करणे शक्य होते. याशिवाय ७६ मिलीमीटरची मुख्य तोफ, पाणबुडीविरोधी रॉकेट लाँचर्स आणि टॉरपेडो यंत्रणाही या युद्धनौकेवर बसवण्यात आली आहे.

आयएनएस दूनागिरीच्या बांधणीत पंच्याहत्तर टक्क्यांहून अधिक भारतीय साहित्य वापरण्यात आले आहे. नौदलाच्या वॉरशिप डिझाईन ब्युरोने या युद्धनौकेचे संपूर्ण आरेखन तयार केले असून देशातील दोनशेहून अधिक सूक्ष्म, लघु व मध्यम उद्योगांनी (एमएसएमई) बांधणीत महत्त्वाचे योगदान दिले आहे.

प्रधानमंत्री मोदी यांनी या कामगिरीचे कौतुक करताना सांगितले की भारत आता केवळ संरक्षण साहित्याचा खरेदीदार राहिला नसून, तो स्वतः एक सक्षम उत्पादक देश बनत आहे आणि जागतिक पातळीवर निर्णायक भूमिका बजावू लागला आहे.

कोलकाता येथील श्यामा प्रसाद मुखर्जी बंदरावर आयोजित या सोहळ्यात नौदलाच्या इतिहासात पहिल्यांदाच तीन वेगवेगळ्या क्षमतांच्या जहाजांचे एकत्र लोकार्पण करण्यात आले.