स्वतंत्र बातमी

राज्य परिवहन महामंडळाची आर्थिक स्थिती मागील काही काळापासून आव्हानात्मक बनली आहे. उत्पन्नात अपेक्षित वाढ होत नसल्यामुळे प्रशासनासमोर आर्थिक गणितांचा ताळमेळ बसवण्याचे मोठे संकट उभे ठाकले आहे. उन्हाळी हंगामात तसेच इतर वेळीसुद्धा उत्पन्नात हवी तशी वाढ झालेली नाही. भाडेवाढ करूनही आर्थिक स्थितीत सुधारणा झालेली नाही. त्यामुळे उत्पन्नाचे नवे स्रोत शोधणे महामंडळासाठी अनिवार्य ठरले आहे. याच पार्श्वभूमीवर उच्च मध्यमवर्गीय आणि उच्च प्रवासी वर्गाला आकर्षित करण्यासाठी व्होल्वो बस चालवण्याचा निर्णय घेण्यात आला आहे. शिवनेरी बसप्रमाणेच खासगी कंत्राट आणि एसटीचा लोगो वापरून ही सेवा चालवली जाईल. आगामी काळात या निर्णयामुळे महामंडळाची आर्थिक परिस्थिती सुधारण्यास मदत होईल असा विश्वास प्रशासनाला वाटत आहे.