स्वतंत्र बातमी

दापोलीतील प्रसिद्ध हर्णे किनारपट्टीवर आढळलेल्या बॉम्बे डोरिड स्लग या सागरी गोगलगायीने संशोधकांचे लक्ष वेधले आहे. समुद्राच्या भरती-ओहोटीच्या काळात खडकाळ भागात हा सुंदर जीव निदर्शनास आला.

सागरी परिसंस्थेत गोगलगायींचे स्थान अत्यंत महत्त्वाचे मानले जाते. या जीवांच्या शरीरावर रक्षण करण्यासाठी पाठीवर शंख नसतो. उत्क्रांतीच्या काळात शंखाचा त्याग केल्यामुळे त्यांच्या हालचालींना वेग मिळाला आहे. आत्मसंरक्षणासाठी त्यांनी स्वतःच्या अधिवासात मिसळून जाण्याची अनोखी पद्धत विकसित केली आहे. धोका निर्माण झाल्यास हे जीव आपले संवेदनशील अवयव शरीरात खेचून घेतात आणि स्पंजमध्ये अगदी सहज मिसळून जातात. त्यांच्यापुढील अँटिनासारखे दिसणारे अवयव घाणेंद्रियांचे काम करतात. पाठीवरील फुलासारख्या दिसणाऱ्या गिल्सद्वारे हे जीव पाण्यातील ऑक्सिजन शोषून घेतात. कोकण किनारपट्टीची भौगोलिक रचना अशा दुर्मिळ जीवांसाठी अतिशय अनुकूल मानली जात असून येथील जैवविविधता संशोधनासाठी पर्वणी ठरत आहे.