“कन्या संक्रांती योग” म्हणजे काय?

वैदिक ज्योतिषशास्त्रानुसार जेव्हा सूर्यदेव एका राशीमधून दुसऱ्या राशीमध्ये प्रवेश करतात, तेव्हा त्या संक्रमण काळाला ‘संक्रांती’ म्हणतात. सूर्यदेव सिंह राशीतून कन्या राशीत प्रवेश करतात, तेव्हा त्याला ‘कन्या संक्रांती’ म्हटले जाते. कन्या ही बुधाच्या मालकीची व पृथ्वी तत्त्वाची राशी आहे. सूर्य हा तेज आणि आत्म्याचा कारक मानला जातो. सूर्य कन्या राशीत आल्यावर बुद्धिमत्ता, व्यवस्थापन कौशल्य आणि व्यावहारिक दृष्टिकोन वाढतो. या काळात सामाजिक कार्य व नवीन योजनांचे नियोजन अत्यंत फलदायी मानले जाते. संक्रांतीच्या पुण्यकाळात केलेली सूर्य पूजा व दानधर्म यामुळे पत्रिकेतील सूर्य दोष दूर होतात, अशी वैदिक मान्यता आहे.